حياتي اليوم صحيفة إلكترونية يومية
بقلم: مروة حسن
سمعت أذان المغرب عند دخولي المركز الطبي عشان ميعاد كشفي مع طبيب الأنف والأذن هناك ولاني مقيمة في دولة خليجية فطبيعي جدا أني اتعامل مع كتير من جنسيات مختلفة سواء عرب او اجانب ، فأول ما دخلت المركز اتعاملت مع موظفة عربية مسلمة في الاستقبال اخدت بياناتي وقالت لي دوري رقم كم ، وعشان وقت المغرب ضيق قلت اسألها عن مكان الصلاة عشان اصلي أنا وزوجي فلاقيتها بترد عليا بسرعة وبدون لحظة تفكير. وبوش متجهم (مفيش مكان للصلاة هنا)!!
الحقيقة استغربت جدا من الرد لأَنِّي متعودة أني ألاقي مكان للصلاة في اي مكان عام او مستشفى او عيادة حتى لو مكان على جنب وبسيط المهم بلاقى دائماً مكان، المهم رحت استنى دوري وكان يبدو ان الدكتور مش في غرفته – تقريبا بيصلي! – فزوجي قال لي احنا كده هتروح علينا صلاة المغرب فقمت وسألت ممرضة ( مش عربية ولا مسلمة) عن مكان للصلاة فجاوبتني والابتسامة على وشها "ايوة في ساحة للرجال ومكان صغير للنساء تعالي معايا اوريكي فين !
وفعلا رحت معاها لحد ما دخلتني مكان صغير فيه سجادة صلاه وقالت لي اتفضلي المكان أهو ،شكرتها جدا ودعيت لها ربنا ينور قلبها للإسلام فهي اتصرفت بتلقائية شديدة وكان ممكن توصف لي المكان وخلاص من غير ما تيجي معايا لكنها اصرت تيجي معايا لحد ما توربيني سجادة الصلاة فين!
وللاسف المسلمة بخلت تقول لي علي المكان او حتى تقول لي معرفش فدعيت لها ربنا يهديها ويهدينا للخير والصواب.
في نفس الأسبوع اتعرضت لموقف استوقفني برضه جدا، لما رحت اشتري مكسرات من محل وكانت اللي بتبيع مش مسلمة وقلت لها عايزة ربع مشكل بين نوعين مختلفين فرق السعر بينهم لا يذكر ،بس لقيتها بتاخد جزء من النوع الاول وبتشوف علي الميزان بالجرام عشان يكون النص بالظبط لدرجة انها رجعت ٣ وحدات من المكسرات في مكانها عشان تكون وزنت بالظبط!
وبعدين عادت الكرة في النص التاني وحسبت كل جزء لوحده وفي الاخر حطيت السعر الاجمالي علي الكيس(كل ده عشان ربع مشكل!)، فقلت سبحان الله على امانتها وحرصها انها متزودتش في الميزان جرام واحد مش مطلوب، وقلت في نفسي لو كان عربي اللي في مكانها كان زمانه خد شوية بالبركة من هنا علي هنا ووزن وزي ما يطلع وخلاص!
الخلاصة
متبنيش انطباعات عالناس من ده شكله ايه او دينه إيه، فياما مسلمين اخلاقهم بعيدة تماما عن الاسلام- نسأل الله لهم ولنا الهداية- وياما ناس مش مسلمة لكن أخلاقها وأمانتها تعلم المسلمين ودول نسأل الله لهم الهداية برضه لان دول لو اسلموا وأخلاقهم كانت كدة من الأصل هيكونوا نماذج مسلمين تقود العالم فعلا.
ونصيحة للمسلمين على وجه الخصوص وبالذات من اللي بيتعاملوا مع غرب او غير مسلمين : أرجوكم حاولوا تكونوا سفراء لدينكم بالمعاملة الطيبة والابتسامة والخلق الحسن وبلاش تنفروا غير المسلمين منكم، وطبعا بلاش تنفروا المسلمين قبلهم !
