حياتي اليوم صحيفة إلكترونية يومية
على فين يا دنيا وخدانا
قولي لنا رايحين فين
نجرى وراك مش عاجبين
نهرب منك ومش عارفين
قالوا عنك غرورة و كدابة
قالوا ظالمة ومبتجيش
غير ع الغلابة
صدق اللي قالوا
عليكى غابة
**
دنيا عمرها ما كانت دايمة
تبكينا علينا وهي فانية
ليه نبكي عليها ولو لثانية
**
داوى بالصبر الجراح
ولا تنام ليلك حزين
انسى اللي ظلمك
وجرحك و جار عليك
واللي عض إيديك اللي
اتمدت يوم اليه
ومهما كان اللي باعك
ونسي فضلك عليه
ما تزعلش وتشيل هم
ما تنكسرش وتقول انهزمت
إياك تبكى وتعيش فى يوم غم
**
خللي اللي يحمل يشيل
ومهما كان حملك تقيل
إرمي حمولك علي
اللي خلق الخلق
عمر ما حد عنده انظلم
ولا عنده يضيع يوم حق
**
افتح مع الدنيا صفحة بيضا
انسى الأسي والأمس
اكتب فى وسط السطر
مفيش من اليوم يأس
**
عارف وسامعك تقول
الأسية ما تتنسيش
بس أنت سامح
علشان تعرف تعيش
ما تفكرش وما تندمش
ما تبكيش على خير عملته
ده بكره ها يرجع ليك
وافرد كفوفك للسما
وبأعلى صوتك
قول ” يارب ”
أكيد ها يستجيب
وأكيد ربنا يرضيك
