حياتي اليوم صحيفة إلكترونية يومية
يكتبه: عبد الناصر عبد العزيز
بعض الأشخاص مستفزين للغاية.. متطفلين للغاية.. سماجتهم زيادة.. وسخافتهم أزيد.
إنهم هؤلاء الذين إذا شاهدوك فى طريق ذاهب لأمر ما.. لايتركوك فى حالك ابدا.. بل يلاحقونك بالأسئلة.. وفورا يفتحوا معك التحقيق.. ويفيشوك إيد ورجل!! ..
رايح فين؟ وجاي منين؟ مش خير يعنى؟ قول بس يمكن نقدر نساعدك فى حاجه؟
ياعم انت بس حل عنى واعتقني لله! وأقفل محضر التحريات اللى فاتحه ليا ده… والسؤال هنا ايه يعني اللي هيحصل في الدنيا لو كل واحد فينا ساب التاني في حاله من غير ماياخد مقاسه أول بأول كده؟.. كنت فين امبارح؟ مين اللي كان معاك ده؟.. اشتريت الحاجه دي بكام ومن مين؟ لوكنت قلتلي كنت عملتلك كذا وكذا! بعد كده تبقى تقولي!
بصراحة .. عادة حشر المناخير فى حياة الناس وخصوصياتهم دى حاجة رخمة ومستفزة وبتسبب ضيق خلق وكرشة نفس… وربنا يعافينا منها جميعا…!
(طاب مساؤكم)
