من كتر فشله ياولداه
اصبح مصاب باللامبالاة
وكان ده عصبى وفتلة تمام
اصبح تخين وبكرش كمان
مشكلته كانت انه همام
بيراعى يعنى اخوه الانسان
ويقول يمكن حتتعدل احوال
لكنه ادرك انه محال
فى الشغل كان شاطر
ونشيط ويقولوا عنه اصله عبيط
وعشان كده اخطاءه تزيد
وزمايله تشمت فيه وتظيط
ورئيسه يخصم بالتحديد
ويقول له ما كفاية تنطيط
يكشف فساد ويقول ده حرام
يجازوه تمالى ليل ونهار
ولما طنش وضميره احتار
رقوه مدير واشترى دوار
ولما كان تلميذ ونجيب
مجموعه ينقص ولا بيزيد
واللى يغش بشكل فريد
كان يبقى اول فصله اكيد
ولما اصبح كده غشاش
طلع البريمو فى غش الناس
وفى مرة ابدى فى رايه تمام
ادوا له علقة وحبس كمان
ولما غير رايه قوام
كافؤه بجايزة يعيش فى سلام
وفى مرة صدمت عربية
طالب ده رايح كلية
وقف يساعده بحمية
واخد ده نمرة عربية
وشاله ده بقوة عفية
وجرى لوحدة طبية
وسالوه شوية من البيانات
ومين اللى صدمه كده بالذات
وقال لهم مااعرفش ياناس
قلت انقذه وانا حالى محتاس
قالوا له تبقى انت الفاعل
وتتحبس كعقاب فاعل
صرخ بشدة وعفوية
وقال ما عنديش عربية
قالوا بخبرة مصرية
ومافيش ده رخصة عربية
تبقى العقوبة دوبلية
غرامة وسحب للعربية
ومن ساعتها يا ولداه
اصبح شعاره اللامبالاة
ويوم جوازه بعد الجيش
هرب بسرعة وقال ده ماليش
ويقول طريقتى التطنيش
عشان مااعرف يعنى اعيش
وتمالى يمشى جنب الحيط
ولا ليه ده دعوة بزيد وعبيد
محسوبكو ساكن فى ابو الريش
واسمه ولقبه يعنى ماليش
دى الدنيا غابة ومفتوحة
وفيها تتعب من الدوخة.
———————
* كبير محررين مترجمين بالإذاعة والتلفزيون.
“الأستاذ ماليش”…قصيدة كتبها ياسر شرف
عدد المشاهدات = 4080