حياتي اليوم صحيفة إلكترونية يومية
ساعات باحلم .. و بأتخيل ..
تكون الدنيا دى .. بروفة ..
لأطول .. فيلم
بدايته آلآم .. و جو زحام ..
و صرخة .. أم
و ناس مبسوطة .. بتزغرط
و صوت مولود ..
على الدنيا .. بيتمرد
نهايته .. نهاية المشهد
*
و نسمع صوت ..
يقول .. كلاكيت .. هنصور
و نرجع تانى .. م الأول
و كل إعادة .. بنطور ..
و بنحسن ..
لحد ماتظبط ..
الصورة .. اللى برانا
مع الصورة .. اللى جوانا
نقدمها لمولانا
و يبقى القلب مطمن
*
لكنى بافوق ..
على واقع .. يأكد لى
بإن المشهد .. اتصور
ومش ممكن .. هيتغير
و حتى صوتى و سكوتى ..
و أيامى .. بتتسجل ..
فى قلب كتاب
و اشوف احبابى و اصحابى
اللى فاتوا الدنيا من قبلى ..
و صبحوا .. تراب
أموت .. م الخوف
لكن بارجع .. و تانى باشوف
إلهى … رحيم
تملى .. بيفتح الأبواب
غفور … تواب
أقول .. سبحانه رب عظيم
قوى .. و رحيم
جعلنا .. بتوبة و استغفار ..
نعيد .. أدوار
و لا نيأس .. و لا نحتار
بحبك ……
مش عشان .. جنة
ولا خايفه .. جحيم النار
بحبك …….
بذرة .. مغروسة فى تكوينى
فى قلبى .. و روحى .. و يقينى
و نهر محبة .. يحيينى ..
و باستمرار
ياساكن نفسى … يا مالك
انا العاصى … و انا التايب
و أنا المغرور .. من عزك
و أنا المزلول .. على عرشك
أنا عبدك .. أسير عفوك
بدون حبك
أنا هالك .. أنا هالك
أنا … هالك
——–
* كاتبة وشاعرة.
