حياتي اليوم صحيفة إلكترونية يومية
كل واحد عايش راسم فى خياله صورة بيحلم يلاقيها فى حبيبه …والمفاجأة ان مش دايما اللى بنوصله بيطابق الصورة ؛؛؛
وده لأننا أوقات بنختار نقنع نفسنا ان الخيال أجمل من اللى بنشوفه فى الحقيقة فبنضيع على نفسنا نشوف حاجة غير اللى فى خيالنا أو على الأقل ندي نفسنا فرصة أننا نركز على شئ تانى غير اللى حصرنا خيالنا عليه!
ممكن نبالغ فى الحب أو ما نديش القدر الكافى منه ؛ وممكن درجة توقعك بتكون مش صحيحة علشان تتكيف مع الأوضاع وردود الأفعال عن كل فعل بتتوقع ان حبيبك يستجيبله بالطريقة اللى انت بتحبها فتحس بإحباط ؛؛؛
لأنك دايماً عاوز حاجة وهو بيعمل حاجة تانية !!
انت نفسك تتكلم وهو مش عاوز ؛؛
انت نفسك يهتم بيك من غير ما تقوله ؛ بس لما بيهتم طريقته مش بترضيك ؛؛
انت نفسك تكون لوحدك وهو نفسه يكون معاك ؛؛
انت نفسك حد يسمعك بس لما يجى يديلك نصيحة تتجاهله علشان مش على هواك !
فتقول لنفسك ده حب مش كافى ؛؛؛؛
وده ببساطة لأن كل واحد موقف مشاعره عند درجة خاصة بيه …
لا هو قادر يغيرها علشان غيره !
ولا غيره قادر يتغير علشانه !
فبيجمدوا مشاعرهم وكل واحد بيحس انه تعرض للألم والرفض وانه مش كافى يقدم حب لغيره !
ونبدأ ندور على الحب ونسأل دايما عنه ؟!
الحب ….بيحتاج لوقت لإدراك ان مفيش حد كامل ولأن لا وجود لشخص كامل إلا فى نظرك انت وبس ؛؛؛
عمرك ما هتعرف ان اللى بتحبه ده حبيبك إلا بعد ما تأخد وقت علشان تعرفه وتلمس انه توأم روحك …لأن القلوب دايماً بتحتاج لوقت كافى علشان تقدر تتفتح لغيرها ولما هتلاقى الحب بينمو مهما كانت الظروف هتعرف انك مع الشخص المناسب …مش بحسبة العقل ولكن بمعرفة طبيعية سرها الروح …
أروحنا هى اللى هتتعرف على الحب لأن الروح ملهاش فى حسبة الأشياء ؛ اللى بيحسب هو العقل …
والعقل هو اللى بيعمل قايمة بشروط ومميزات الحبيب ولو مشيت ورا عقلك يبقى علشان تعرف تدى وتأخد الحب بأفضل الطرق وباللى يخلى الحب يمشى بطريقة فعالة …تقدر تفتح فيها قلبك لغيرك والروح هى اللى هترشدك تستمر فى مسيرتك أو لا ؛
لان أوقات كتير لما بنفتح قلوبنا بنكتشف اننا مع الشخص غير المناسب وحتى الحب نفسه بيكون مش كافى علشان نكمل ! لأن الروح غايبة ؛؛؛
الروح هى اللى بتخلينا نحس من أعماق قلوبنا اننا عاوزين الشخص ده يشاركنا حياتنا وأى شئ بنوصله أو بنأخده ونحس انه جه بسهولة من غير من نسأل جه أزاى بيكون دليله ان الروح هى اللى اختارته ….
كل انسان بنقابله فى حياتنا بيكون عنده صفات ومميزات خاصة بيه بتخليه فريد من نوعه ومش هنقدر نميز شخص عن شخص غير لما الروح هى اللى تميز مين اللى نقدر نعيش معاه بالحب طول الحياة وكأنها سحر ….
وكل ما هتلاقى حاجات بتظهرلك مهما ضاع الغلاف وكل حاجة وصلتلك بالتدريج وباستمرار وبثبات لإحساسك
هتعرف انه مش مجرد انبهار او احساس بمتعة أو انجذاب لشكل خارجى أو جمال جسدى فقط !
الروح هتعلمك الطريقة اللى هتقدر تحب بيها غيرك واللى هتقدر تغير طريقة ونمط حياتك وتفهم غيرك عاوز وبيحب ايه وتعمله علشان انت بتسعد نفسك انت ….بتعمله علشانه مش علشان ترضيه !
وهتلاقى ان ضحكتك من ضحكته ….وتعبك من تعبه ؛؛
الحب مش خيال ولا قصايد ولا قصص وأفلام
دايماً بنتكلم عنها واحنا عارفين انها مش موجودة فى الحقيقة وده اللى بيخلينا دايما نتكلم عن حاجات بنفتقدها فى الحب علشان ما اتعلمناش ازاى نحب علشان نلاقيه ؛ بنشوف ولما بنيجى نطبقه بنفشل !
الحب حقيقة ملموسة ومحسوسة وكل حاجة فيها لازم نحس فيها براحة حتى لو الحياة صعبة …تتكلم وانت مش خايف تغلط ولا عامل حساب لكلامك … كأنك بتكلم نفسك وبترتاح…
راحة الروح بتهون التعب ؛؛؛
الأرواح زى البيوت.. ..
وكل روح مسيرها لبيتها تعود وترتاح ….!
