حياتي اليوم صحيفة إلكترونية يومية
الحب هو عزاء لأرواحنا وبيسهل علينا تحمل ألم اى شئ بنآسى منه أو اى ظلم بتعرض له…
لما بنحب حد بنعتمد على وجوده فى حياتنا .. اهتمامه بكل حاجة بنعملها وتقديره لأى عمل بنعمله بيخلق لحياتنا معنى …بتتعود منه على شعور واحساس معين ..ودايماً بتربط سعادتك بوجوده هو وبس ؛ بتبقى مش متوقع انك فى لحظة ممكن تفقد الحب ده أو الشخص اللى بتحبه ! علشان كده مرحلة ألم الفقد بينحسر أحساسها فى ألم لا يحتمل علشان مش قادر ترجع حبيبك فبتتصور ان الألم لن ينتهى ؛؛ بتبقى مركز ان كل حاجة فى حياتك هتكون وحشه من غيره ! وكتير بيدمر حياته بسبب أستسلامه لشعور الفقد لانه لم يتوقعه ولم يتخيله !
بيعيش قلبه بيتوجع من الوحدة ؛مصاب بالذهول لعجزه وعدم قدرته على تغيير ما حدث له حاسس ان الوقت بيعدى ببطء؛ لا يملك ما يؤهله لكى يشفى جراحه فيبدأ يسمع نصائح الأصدقاء والأقرباء أو اى شئ بيجى على باله وقتها وده بيخليه يأخد قرارات بيبقى فاكر انها معقولة ولكنها فى الغالب بتوصله لنتائج عكسية !
لانها بتكون زى المخدر بتخلية يحس براحة مؤقتة ولكن ؛؛ على المدى البعيد لا تكمل شفاءه !
وتبدأ معركة ملء كل لحظة ألم بلحظة شفاء ؛؛؛
لما بنفقد الحب القلب بيأخد وقت أطول من العقل علشان يتكيف مع اى وضع جديد
فالقلب مش بسهولة ينسى فى خطوة واحدة ولكن بالتدريج كأنها عملية مد وجزر ….
ففى الجزر …نتخيل اننا سنجد الحب مرة تانية وان كل شئ هيرجع لطبيعته ويبدأ عقلنا يتكيف مع الخسارة وبيكون عندنا دافع اننا نتقدم للأمام ….
بس بتيجى مرحلة المد وتسيطر علينا مشاعر الغضب والحزن وتفكرنا اننا فقدنا ما نحب فيرجع أحساسنا تانى للخلف !!!
وتبدأ معركة القلب والعقل فى التغيير والتكيف لمحاولة تصحيح المسار للوصول لعملية الشفاء …
عملية الشفاء ممكن تحصل لو بدأنا نشوف الماضى والأوقات المؤلمة اللى مرت علينا ونبصلها نظرة عرفان بالجميل لكل وقت قدرنا نأخد منه لحظة حب طيبة …نتعلم حاجة من ذكرياتنا اللى كانت بتربطنا مع اللى بنحبهم …وتفتكر قد ايه الإنسان ده قدملك حاجة حلوه أو بحبه ليك أو حبك له كانت حياتك حلوه…
فتبدأ تعلى من شعور الحب على شعور الألم حتى لما تفتكره وتلاقى دموعك بتنزل هتلاقى نفسك فجأة بتحولها من دموع حزن لدموع عرفان بالأوقات الجميلة الخاصة اللى كانت بينكم …
ألم الفقد جزء لا يتجزأ من الحياة وانت مش لوحدك اللى سلكت أو مريت بطريق الألم …كتير مروا منه ونجوا وتابعوا حياتهم ليحبوا تانى ويلاقوا اللى بيقدرهم وانت كمان ممكن تلاقى الحب من تانى ….
لما تفتح قلبك بشكل مختلف وتبدأ تتعلم رؤية الأشياء والأشخاص بشكل حقيقى وتعرف ان حياتك مد وجزر …!
