الأحد , 28 نوفمبر 2021
الرئيسية / بقلم: رئيس التحرير / برجاء..إعدام الحمير!

برجاء..إعدام الحمير!

= 2650

Magdy El Shazly (2)


هو أيه الحكاية معاكي يا مصر، وأيه حكايتكوا يا مصريين؟

هو ليه الضمير بقى غايب كليا عن حياتنا بالشكل القمىء ده، وإزاي ناس – المفروض إنهم ناس – تجيلهم الجرأة إنهم يدبحوا حمير، وبكل ارتياح نفسي ووجداني يقدموها لناس تانية علشان تاكلها، وإزاي لحد دوقت لا بنسمع ولا بنشوف غير "ضبط".. "ضبط"، وكل يوم وفي كل حتة فيكي يا مصر، يلاقوا حمير مذبوحة ومسلوخة!

من كام يوم ضبط 250 حمار مدبوحين بالطريق الصحراوي في سوهاج، وحمير تانيين يمسكوهم بيسلخوا حمير في مزرعة بطنطا، وآخر كالحمار أو أضل سبيلا يتمسك في كمين أمني بالعمرانية ومعاه 600 كيلو لحم حمير في عربيته الملاكي، ويعترف بعد كده إنه بيدبح الحمير في الشروق ويوزعها على الجزارين في العمرانية..!

وخد عندك كمان..ضبط عامل وسائق في الشرقية، واحد معاه 7 حمير مدبوحين في عربية نص نقل، والتاني شايل لحمة 5 حمير حمرا مزنهرة في عربية زيها تمام، واللحمة دي كانت في طريقها طبعا لمعدة المصريين اللي تفرم الزلط!

يا خبر أسود!

أومال فين الأحكام الرادعة، ولا هيه الناس دي بتطلع تاني بشوية ألاعيب قانونية، علشان تمارس أعمالها السودة دي تاني، وليه مبنشوفش المجرمين دول وهم بينعدموا في ميدان عام علشان نرحم الناس من بلاويهم، وكمان اللي بيفكروا يعملوا كده، نمنعهم يبقوا شياطين زيهم برضه؟ 

يا جماعة، الواضح إن العيب مش في الناس دي..العيب فينا أحنا اللي مبنعرفش ناكل..ومبنقدرش جهودهم السخية في حل أزمة اللحوم في مصر..انتوا فاكرين مذبحة الحمير الشهيرة اللي اتمسكت في الفيوم من حوالى سنة، وبعد ما الدنيا قامت في مصر ومقعدتش تاني، فجأة اكتشفنا إن دي كانت "وجبات الديلفري" اللي طلبتها الأسود في حديقة الحيوان، وطلعنا إحنا اللي ظالمين الناس يا عيني!

يا سادة يا كرام..يا حكومة مصر..لازم تشوفولنا حل، وتعدوا كام حمار موجود في البلد دي – ولا مؤاخذة – ويا إما توفروا لهم الحماية الكاملة، وتراقبوا كل تحركاتهم، أو تريحوا دماغكوا وتريحونا معاكوا ، وإعدموا الحمير دي كلها ولا مؤاخذة!

مجدي الشاذلي

—————

Shazli9@yahoo.com

شاهد أيضاً

مجدي الشاذلي يكتب: العيد..ولغة المشاعر!

عدد المشاهدات = 46446— أكرر دائما في كل مناسبة، ان التكنولوجيا أخذت الكثير من بهجة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: