حياتي اليوم صحيفة إلكترونية يومية
القاهرة – حياتي اليوم
في ايام الشتاء والبرد ما نعملش ايه ونعمل ايه علشان نحافظ علي الجلد ونضارة البشرة وسلامة الشعر ؟
فيما يلي يقدم الدكتور هاني الناظر استشاري الأمراض الجلدية، روشتة التعامل الآمن مع فصل الشتاء للحفاظ على البشرة والشعر..
بلاش شرب المياة الغازية واكل المثلجات ولكن علي العكس نكثر من شرب السوائل الدافئة زي القرفة والزنجبيل والكاكاو ونحرص علي الشوربة الساخنة في الغذاء مثل شوربة العدس ..
بلاش غسيل الشعر والجلد بالماء البارد ولكن لازم الغسيل يكون بالماء الدافئ وكمان بلاش الوضوء بالماء البارد ولابد ان يكون ايضا بالماء الدافئ ..
بلاش غسيل الشعر كل يوم ولا مرة واحدة في الاسبوع ولكن يومين في الاسبوع معقول ..للبنات والسيدات بلاش الخروج الصبح بدري من غير تدفئة كويسة جداً خاصة الايدين ولازم لبس تقيل وجوانتي لليدين وكمان بلاش خروج من غير كريم مرطب علي الوجه والصح اي كريم يحمي الوجه من هواء الصباح البارد ….
بلاش مع البرد الشديد الجلوس في المنزل والقدم عاري ولكن ينصح بارتداء شراب قطن لمنع جفاف وتشقق الكعبين … بلاش نترك الذراعين والساقين بدون مرطبات ولكن ينصح بالدهان بمرطب والفازلين شئ ممتاز في الترطيب ..
بلاش نكسل ننشف أيدينا وحول الفم بعد الغسيل بشكل جيد جداً خصوصا الاطفال ولكن لازم ننشف كويس جداً علشان نمنع قشف الجلد واذا حصل ممكن نستعمل الجلسرين لعلاج المشكلة ..
بلاش نترك الاطفال يناموا وفمهم مفتوح ولكن لازم نتأكد ان الفم مغلق علشان نمنع تشقق الشفاة واذا حدث فان العلاج يكون بدهانها بخليط من عسل النحل والجلسرين ..
اخيراً بلاش نصدق الاشاعات اللي بتتنشر كل يوم بالليل علي الفيس بوك لانها بتوترنا وتعمل لنا قلق مما يصيبنا بكل انواع المشاكل الجلدية وسقوط الشعر!
