حياتي اليوم صحيفة إلكترونية يومية
{يا ايها الولد الذى}
دايق مرار ذل السنين
واخد قرار
مرفوض خلاص الانتظار
ويا التراب ويفيد بأيه
رغم الحنين كتف ايدين العطشانين
ويجيب منين ويروح لفين ؟
مااااات الضمير
خلى الجدع مايشوفش غير
روحه ف يم ملهوش قرار
لما لقى دمعة لأم .كان نفسها تكمل علاج
واخته اللى محتاجه لجواز
قاعده وبايره من زمن
من فقرها .. كان حلمها
طرحة بيضة مطرزة
فجأه اتكست بالظلم ليه؟
جالوا اكتئاب
قام شعلقه ف امواج عذاب
شهقات لروح وألف روح
ونهار يفتح فالجروح
مات الجدع .نادوه غريق
لكن الحكاية ف اصلها
كان نهشه حوت
اصل الحيتان وضميرها مات
دايما بتملى بطنها
ماسبتش لقمة للجعان
ما الحوت حقير
بيعجزك ويفلسك ويتوهك
مع سكتك بيوقعك وبيبلعك
آخرتها راح تلقى القروش
راح تلعنك ما انت الفقير
لو كان ضناهم اتقسم
او يتخرس
كان انحسم امر الجعان
وده مش مهم آخدين عليه
لكن العجيب حبة بواقى عندنا
ف اشكال بشر
سابوا الحيتان ويلوموا فيك
يا دى الجدع
رايح بتجرى عالدولار
والاحتضار كان فـ انتظار
النفس عجّل آخرتك
فى القاع رسمت بجثتك
صورة الضياع
ولا فيش حكيم
ياحكيم و نايم ع البساط
والانبساط جرة قلم
تطحن عضام م المبتدا
قهر وغلا
والفرحة تيجى ليها جر
بتشدها تطلع دموع
اطفال شوارع مننا
ضايع ومخطوف وسطنا
ومافيش قانون راح ينصفك
وقانوننا مات
راح وانعدم كل الحنين
اما الفشل طربوش على راس الجعان
حتى الكلام بقى من عدم
لما انعدم صوت الامل
لو تفهموا
شوفوا المحيط مش بس حوت
لازم يبات شبعان ليلاتى مننا
ولا احنا دود ياكلونا ديما من سكات
انا عارفة مهما فضلت اهاتى
مفيش ضمير..
حتى الجدع مات وانخرس
ولاقلب ليه مرة اتوجع
اصل الجدع
كان نفسه اسمه يكون حضور
بس الاسف اول حضور
كان ليه غياب
