حياتي اليوم صحيفة إلكترونية يومية
علاقة معقدة هى " الصداقة" ..بتأثر فينا ..هو الصاحب اللى ليه مكانة خاصة عندك …لازم لما تعلم علم صح بلاش تعلم غلط ..حتى لو غلطت ..كلنا معرضين لكده ..
هى مش مجرد صداقة نادى او مدرسة او جامعة ..علاقة من نوع خاص .. بنفرح أوى لما نلاقى حد شبهنا فى التفاصيل والجنان ..بتحس انك خلاص لقيت اللى تأتمنه على أسرارك وحياتك ..كل ماتكتر المواقف ..تقل الصحاب ..ها عرفت صاحبك.. خلاص علم عليه !
الصداقة الحقيقة مش بطول فترة معرفتك بشخص ..المواقف الصغيرة اللى تبين مين صاحبك بجد ..كلنا نتمنى الصاحب الجدع اللى يقف فى ظهرك وقت شدتك ويسندك ويقولك انا جمبك ..وقت حزنك او فرحك اللى يبقى مبسوط ليك ..ويفرح لفرحك وكأنه فرحه هو ..وقت انكسارك هو السند ..ولما تلاقى الصاحب الجدع..علم عليه !
لما الحياة تتغير..وكل حاجة تبقى ماشيه بالعكس معاك ..هو اللى يصبرك ويقويك ويقولك عافر وكمل ..وقت لما الكل سابك هو الوحيد اللى فاضل يفرح لفرحك ويزعل على زعلك ..الصاحب الجدع !
اللى يحبلك الخير..اللى ميغيرش من نجاحك..اللى ينصحك ويخاف عليك..ويحسسك انكم زى الاخوات واكتر ..ويتمنالك الخير..
متنساش.. علم صح على الصاحب الصح !
