حياتي اليوم صحيفة إلكترونية يومية
أنا زي البمب… أنا زي الحديد..كلمتان تقولهم لروحك وانت واقف أدام المراية، تلاقي نفسك بقيت تمام !!
هو ده الحل..بالزبط كده زي ما قال وزير الصحة « الفنان نظيم شعراوي » للمواطنين الغلابة في فيلم النوم في العسل.
وبرغم سخرية الفيلم من هذه النصيحه إلا أنني اجدها ملائمة لحال المواطن المصري اليوم، في ظل الظروف القاسية التي يمر بها، والتي يمكن ان نري فيها جانبا آخر جميلا ومفيداً !!
فمثلا…لو اعتبرنا أن بداية ازمات المواطن كانت هي نقص السكر..إيه يعني !!
آخرتها اننا مش هنقدر نحلي الشاي، يبقي بلاش شرب شاي، ده حتي بيحرق الحديد في الدم، وكتر السكر بيجيب أمراض!!
إيه تاني ؟ البنزين سعره ارتفع !!
طب ما يرتفع.. آخرها إيه ؟ مش هتعرف تملا التنك ؟
يبقي بلاها عربية وبلاها مواصلات واركب عجلة، أو خدها «موتورجل « هتلاقي نفسك بقيت رشيق واتخلصت من الدهون والشحوم الزايدة، صحيح وشك ورئتك هيتملوا تراب !! ويمكن عربية تهفك وانت ماشي في شوارعنا العامرة، بس برضه أرحم من تضييع فلوسك عالبنزين !!
نيجي للدولار..وأزمة جنان الدولار اللي ما سابتش حد في مصر كلها إلا واتكلم عنها، علما بأن أغلب المصريين عمرهم ما مسكوا دولار ولا حتي شافوه !!
لكن لو دققت تلاقي للأزمة دي فوايد عظيمة، انها كشفت إن داخل كل واحد منا خبير اقتصادي عميق !! مافيش زيه ولا حتي في صندوق النقد الدولي !
وكل واحد نازل تحليل في الموضوع لحد ما اشبع كل عقد النقص والشعور بقلة القيمة اللي جواه، وفي ذلك فائدة عظيمة(شكرا دولار ).
فاضل إيه ؟
أزمة التهاب فواتير الكهرباء..بدل الشكوي ، ليه نسهر من بعد المغرب !! ولا ننور لمبات موفرة ولا لمبات مبذرة !!
وبدل الفرجة عالتلفزيون كفايه نتفرج علي أحوالنا اللي مافيش زيها لا في تراجيديا النكد ولا في الكوميديا السوداء !!
بأقولكم إيه…ما بلاش نعيش من أساسه، والموت راحة لنا من كل شر…حتي ما نجيبش في سيرة الناس ولا نشتم في الحكومه وناخد ذنوب !!
شفتوا بقي وعرفتوا إن العيشة اللي احنا عايشينها دي، والبلاوي اللي بتحصل فينا دي، هدفها الأول والأخير راحتنا..بس راحتنا الأبدية !!
وإننا لما نوصل للحقيقة دي لازم نقول شكرا لمن أوصلنا لهذا الحال!
من أجل هذا..ولهذا
خلينا ناخد من كل حاجة شايفينها وحشة في حياتنا صورة حلوة ولو بالكدب !!
خلينا نقف أدام المراية ونقول..الدنيا حلوة، الدنيا رخيصة، وكله تمام..تمام التمام .
————-
daliagamal2020@yahoo.com
