حياتي اليوم صحيفة إلكترونية يومية
تقدر تسميهم الكتلة الحرجة ٠٠ يعني عددهم مش ملايين ولا عندهم تنظيم يجمعهم ٠٠ ولا عندهم سلاح او تمويل أو دعم دولي ٠٠ ولا عندهم جزيرة تحميهم ولا عربية تطبل لهم ٠٠ هما الشباب اللي نزلوا التحرير يوم ٢٥ يناير وسابوه يوم جمعة قندهار ٠٠ هما نفسهم اللي نزلوا الاتحادية والتحرير يوم ٣٠ يونيو ٠٠ هم الكتلة الحرجة اللي لما بتتحرك خطوة لقدام بتوقع أي نظام ٠٠
اللي حصل يوم الجمعة ده رسالة قوية من الكتلة الحرجة ٠٠ تقدر تقول عليها كده بتقولك احنا طول الشهور اللي فاتت كنا مرعوبين نتحرك عشان الاخوان مايركبوش ٠٠ بس اللي بيحصل حوالينا ممكن يخلينا نتحرك ٠٠٠
الرسالة قوية جدا جدا جدا
لو سيادتك قعدت تعد وتقول دول مايكملوش ٥ الاف واحد نزلوا هاقولك اهلا بيك في الطريق الوحش لانهم بدأوا مع مبارك ب ٥٠ واحد قدام نقابة الصحفيين ٠٠٠
متوقع إنك هاتتحرك عشان تستوعب الغضب الشعبي ده ٠٠٠
متوقع إن مجلس الشعب ممكن يرفض الاتفاقية أو علي الاقل يدرسها ٤ سنوات ٠٠٠!
متوقع إن في اجراءات كثيرة ممكن تتاخد في الحريات ٠٠٠
متوقع قانون لحرية تداول المعلومات ٠٠
متوقع إشراك شعبي حقيقي في كل المشروعات القومية اللي بتعملها دلوقتي ٠٠٠
متوقع إن سياسة التخوين تنتهي والناس اللي بيطلعوا في الفضاءيات يهينوا مصر والمصريين يسكتوا شوية ٠٠٠
متوقع إني ابطل اسمع اخبار بلدي من الصحافة الاجنبية ٠٠٠
متوقع قوة أكثر في مواجهة احتكار السوق من بعض رجال الاعمال ٠٠٠
