في حاجات مؤلمة بتحصل في حياتا
ربنا بيعملها عشان خاطر حاجات تانية
ممكن أقرب واحد في الدنيا ليك يموت عشان خاطر ناس تانية تعيش
في واحدة ست عظيمة اسمها مني الوتيدي ٠٠٠
تقريبا كده في اوائل الخمسينات من عمرها
سيدة أعمال ناجحة حققت ثروة كبيرة جدا
إبنها الوحيد ربنا إختاره في حادث سيارة
الست دي ماقعدتش تبكي وتندب حظها كثير
تبرعت بكل ثروتها اللي هي ٥٠ مليون جنيه لمستشفي سرطان الاقصر
لم يتبق لها سوي الفتات
عايشة دلوقتي في شقة صغيرة
كل حياتها سخرتها لصالح المستشفي
بتجمع تبرعات وبتحل مشاكل وبتجيب أجهزة
بفضل موت ابنها فيه١٣٠٠ مريض غير قادر عندهم سرطان بيتعالجوا دلوقتي في المستشفي ودي عدد حالات الشهر الاول٠٠
علي فكرة هي رفضت تقول اسمها لكن الناس في مؤسسة شفاء الاورمان ماقدروش يخبوا ولما اعلنوا اسمها زعلت جدا
وممكن لما تقرا كلامي ده تزعل رغم اني ما اعرفهاش شخصيا
ماتزعليش ياست الكل وحقك علي راسي
انا باكتب عنك عشان الناس تحس بالامل
مخدش يستجيب لاحباط اللي حواليه
عشان كل واحد فقد عزيز عليه يعرف إن فيه حكمة من عند ربنا
والله العظيم المصريين حلوين وبخير
وستات مصر بكل رجالتها
الموت عندنا كرم
مين فينا ماعندهوش حد عزيز عليه مات وبيوزع من فضل موته صدقات علي الغلابة ده حتي الغلابة نفسهم بيوزعوا علي اللي اغلب منهم صدقة عشان اللي ماتوا ليهم
بفضل مني الوتيدي واللي زيها مصر هاتفضل محروسة
كرم ربنا كبير علي مصر بوجود واحدة زي الست دي علي ارضها
لو في جيبك فلوس اي فلوس بعد ماتقرا كلامي ده طلع منها جزء للخير مريض أو طالب محتاج يكمل تعليمه أو محتاج أو حتي اشتري بيها لعبة لطفل يتيم إختار اللي يستاهل بنفسك واعمل الخير بيدك
لو مش معاك فلوس روح أقرب دار مسنين وأقعد مع الناس الكبار هناك هايفرحوا بيك أو بيكي قوي
احنا عاوزين نكبر رصيدنا في بنك المحبة