حياتي اليوم صحيفة إلكترونية يومية
—
في فيلم اسمه “البلياتشو” لما اتعرض وسمعت الأغنية بتاعته اتأثرت أووووووي بيها… وعرفت ان في الدنيا فيها كتير من البلياتشو… فكرتوا شوية فيه؟
فكرتوا انه ممكن يكون مهموم حزين وبالرغم من ده لازم يطلع كل يوم علي المسرح او في السيرك يضحك كل الناس؟
مين فينا بلياتشو؟ مين فين مش جواه قصة كبيرة حزينة؟ مين فين مش جواه حاجة مضايقاه وبالرغم من كده عمره ما بان عليه؟ مين فينا نفسه يخلع القناع ويقلع لبس البلياتشو عشان يقدر يحكي كل اللي جواه؟
كل واحد فينا جواه حكاوي وقصص كتيرة أووووووي عن خوف وحزن وعشق وحب وهجر وفقد وحرمان واشتياق..
كل واحد فينا عنده شعور مختلف عن التاني بس كلنا بنخبيه… كلنا بنداري… كلنا بنخبي… وكلنا لابسين بلياتشو…
حلو انك تضحك وتخلي الناس مبسوطة وسعيدة… بس انت كمان حاول تتخلص من كل المشاعر اللي تخليك متضايق… واضحك من قلبك بجد… واتبسط بجد… وبلاش نبقي بلياتشو… لازم نرضي باللي ربنا كاتبهولنا.
