حياتي اليوم صحيفة إلكترونية يومية
قالّي اكتب عن جرعة أمل
قولت له…
ما ينفعش نزرع أمل فـ أرض بور
أرض كلها شوك
والملح فيها بالكوم
وشوش متلوّنة
وفيها ألف… لا ألف لون
مين فيهم صادق؟
ومين بيبدّل جلده كل يوم بلون؟
مين السعيد بجد؟
ومين ضحكته مدفونة جوا العيون؟
مين بياكل وهو مبسوط؟
ومين بياكل غصب…
علشان دوا
ولا علشان يعيش يوم كمان ويعدّي الكون؟
قالّي الأمل بسيط…
قولت له الأمل موّال كبير
اتكتب بدم الناس
واتغنّى بحزن السنين
بقى صعب المنال
ف الزمن ده
بقى زي حلم بعيد
بنمد إيدينا عليه
نرجع فاضين…
ولا كأن كان لينا إيد
بندور عليه ف يوم
يمكن ييجي… يمكن يعدّي
لكن الأرض بقت بور
ما فيهاش غير جذور شك
مستخبية تحت الخطوة
تستنى رجلك…
ولما تمشي… تشوكك فجأة
وتفكّرك
إن حتى الأمل بقى ضدك
فين الأمل
اللي كان أمل لكل محروم؟
دلوقتي بقينا ندور
على لقمة… يادوب تسد جوع
حتى اللقمة بقت أمل
وبقت حلم ليوم جاي
نصحى عليه ونقول
يمكن النهارده يعدّي من غير وجع تاني
أوعى تقولي جرعة أمل
من واحد موجوع
وشايف الأرض البور بعنيه
مش سامع حكايات…
ده عايشها…
ومدفون فيها حي
الأمل مش كلمة تتقال
ولا جرعة تتاخد وخلاص
الأمل لو ما اتزرعش فـ أرض صالحة
يبقى وهم…
وإحنا اللي بنسقيه
من عمرنا… وخلاص
