كبسولات مهدئة…(الشخصية الهستيرية)…تكتبها رشا صيرة

دايماً بنلاقى كلمة هستيريا بتتقال على من نظن به الجنون أو( الهبل )!!

بس فى الحقيقة كلمة هستيريا تعنى الأعراض التحولية اللى بتطرأ على اى مريض بيعانى من مشكلة نفسية لانه بيصاب بنوبة غريبة مفاجئة ، بتشل حركته وممكن تسقطه على الأرض وتخرسه عن الكلام !! الأعراض المفاجئة بتظهر نتيجة لصراعات نفسية داخلية يطلق عليها فى علم النفس ( الاضطراب التحولى )
كلمة هستيريا … .تعنى باللغة الإغريقية ( الرحم ) فالأغريق فى العصور القديمة كانوا بيعتقدوا ان الرحم يجف ويصبح أقل وزناً وبعد ذلك يستقر الرحم فى البلعوم فيحدث صعوبات فى التنفس بالنسبة للمرأة !! وبعد ذلك أثبت علماء التشريح فى القرن السادس عشر ان الرحم مثبت فى الجسم بأحكام ومن غير المحتمل انه يتحرك من مكانه … لكن هذا الأعتقاد ظل سائداً لمدة طويلة مما جعل الهستيريا على علاقة وثيقة بالمرأة؛؛؛ لكن بعد ذلك تشخيص أضطراب الشخصية الهستيرية بقى بيحدث للرجال أيضاً مثل النساء …
ويرجع السبب الرئيسى فى أرتباط الشخصية الهستيرية بالمرأة وأعتبارها صفة رئيسية من صفاتها ؛؛؛ان المرأة بتحمل جرعة زائدة جداً من المشاعر وزيادة عليها انها مشاعر غير مستقرة ؛؛ ودايماً المرأة بتعيش تدور على الأهتمام وبتهتم بالتفاصيل ؛؛ وبتعانى من انها بتعتمد فى ثقتها بنفسها على آراء الآخرين !! كل ده بيديلها شعور بنقص الأهتمام والأحتياج للحنان و وتبقى محتاجه اللى يعوضها عنه ؛؛؛ واول ما تحصلها مشكلة او تحس بالفقد وتضغط على أعصابها يحصلها( أضطراب) فى تصرفاتها !!
الشخصية الهستيرية بتظهر فى بعض الصفات :-
١- الهستيرى ….أكتر الشخصيات اللى بيحب لفت الأنظار والأستحواذ على أنتباه وأهتمام الآخرين له بأستمرار .
٢- الهستيرى ….بيبالغ فى التعبير عن أنفعالاته ومشاعره بتصرفات وعبارات قد لا تتلاءم مع الموقف وأحياناً يكون عاجز عن التعبير عن المشاعر .
٣- الهستيرى ….شديد المبالغة فى نشاطه وحيويته وبيميل إلى التجديد والتنويع فى الأهتمامات والمظاهر والممتلكات والعلاقات الشخصية وبيكره الروتين والنمطية .
٤ – الهستيرى ….مبالغ فى إقامة علاقات إجتماعية كتيرة ومتنوعة مع أصحاب الجاه والمال والمنصب علشان يوسع دائرة الأهتمام الإجتماعى والتواجد تحت الأضواء الساطعة اللى بتجذب إليه الأنظار وعلشان كده تلاقيه بيكون سريع التقلب والتحول على حسب موقع الأضواء المسلطة عليه .
٥- الهستيرى ….سطحى وبعيد عن الواقع ويحمل قدر من السذاجة.
٦ الهستيرى ….ضعيف التحمل وسريع الغضب ومعندوش نظرة تطلع للمستقبل ولا أستعداد له ودايماً عايش فى الماضى .
٧- الهستيرى ….بيفقد صبره بسرعة ومعندوش قدرة على التحمل ولما بيتعرض لضغط نفسى وأزمات أحباط بيدور على أستعطاف الآخرين وجذب الأنتباه إليه بصورة ملحوظة .
٨- الهستيرى …..بيستخدم أسلوب الأغراء والمبالغة فى الزينة والملابس.
٩- الهستيرى ….بيطلب السعادة من خلال اعجاب الآخرين والحصول على رضاهم ، وكل اللى حواليه علشان بيشوفوه إجتماعى ومرح ومحبوب بيوافق على كلامهم فبيوافقوه على رأيه و بيعجبوا بيه وبيسعدوه .
١٠- الهستيرى …..أعمى عن عيوب نفسه وماعندوش قدرة على إصلاحها .
١١- الهستيرى ….مبذر فى المال والمجهود والطاقة بغرض كسب أستحسان الناس .
١٢- الهستيرى …..منشغل بالمظاهر وغافل عن حقائق الأمور .
لو فى حياتك شخصية هستيرية هتلاقى أكتر ما يميزها هو قدرتها على الهروب من مواقف معينة من خلال تقمص شخصية تانية غير شخصيتها !! زى الممثل اللى بيقدر يتكيف مع كل دور بيتحط فيه ويبدمج مع الشخصية اللى بيتعامل معاها وبينفصل عن شخصيته الأصلية …
كمان الشخص الهستيرى بيقدر يقوم بالأعمال اللى بتحتاج تعامل مباشر مع الناس مثل الخطابة واللقاءات والعلاقات العامة والتمثيل المسرحى ومذيعى الإذاعة والمهن اللى بتحتاج إلى لباقة فى الحديث والإقناع .
علشان كده هتلاقى الهستيرى له قدرة على العرض المسرحى للمشاعر والمبالغة فى إظهارها وده بيرجعه علماء النفس إلى تجربة سنوات الطفولة المبكرة اللى ممكن يكون الشخص فقد فيها لقدر من الحب والحنان والأهتمام ؛ أو أنشغال أسرته عنه وعدم تلبية إحتياجاته بالشكل اللى كان بيرضيه بأنشغالهم بنفسهم فى بعض الأحيان ؛؛؛ فبيكبر مضطر انه يظهر مشاعره وعواطفه بشكل تانى ؛؛ فى محاولة منه أنه يخفى ويبعد عن مشاعره الحقيقية المليئة بالخوف والحرمان والوحدة وذكاءه بيساعده انه ينجح فى إجبار اللى حواليه الانتباه لوجوده وسماعه وتلبيه احتياجاته المفقودة …
الشخص الهستيرى مش مؤذى بالعكس هو أكتر واحد بيحب الناس تحبه وتكون قريبة منه وبيعمل المستحيل علشان ده وفشله فى العلاقات مع الآخرين بيكون نتيجة التذبذب العاطفى والأنانية وحاجته لكسر الروتين وعدم حصوله على الأهتمام الكافى من اللى بيحبهم !
الشخص الهستيرى لو وصلت حالته إلى حد المرض أكثر حاجة بيكون محتاجلها هى الحب والتفهم لحالته ….خاصة بين أفراد أسرته والمحيطين بيه بأحتوائه وإظهار مشاعر العطف والأحترام لما يعانيه ….
وأخيراً …..
“الشخص الهستيرى هو شخص كل حياته بتدور حوالين الناس واى حاجة بيعملها بيكون هدفه منها الحصول على اعجاب الناس وكسب الود والحب وانه يسمع كلام حلو يرضيه .”