“إفتحوا للحب مطرح”..قصيدة بقلم الشاعر صابر عويس

إفتحوا للحب مطرح
إجمعوا فيه الحكاوى
إزرعوه بالأرض تطرح
سنبله وورده تداوى
ليه نعيش بالكره واحنا
أد ماجرحنا إنجرحنا
أد ماحزنا فرحنا
إيه يفيد وإيه يساوى
هى دنيا بينا راحله
وبإيدينا نعيش ونحيا
تبقى فرحه نعيشها أحلى
ولااا حزن وقلب خاوى
إبعدوه … ليل الجراح
إندهوه … فجر السماح
يتولد … نور الصباح
نور يقرب نور يداوى
نور يدوب كره فينا
نور يقرب حب لينا
نور حاضرنا ونور ماضينا
نور بيعشق .. كل غاوى
إفتحوا للحب مطرح
إجمعوا فيه الحكاوى