حياتي اليوم صحيفة إلكترونية يومية
ممكن تعيش حياتك كلها وانت مش عارف انت عايش ليه؟ من السهل على الآخرين إنهم يشوفوا اللى إحنا مش قادرين نشوفه بنفسنا!
وممكن يكون عندهم القدرة على انهم يساعدونا علشان نوصل لحقيقتنا اللى هتخلينا نعيش حياتنا بشكل يرضينا قبل ما يسعدنا ؛ وده علشان يحصل محتاج انك تسمعهم وتصدق حلمك وقدرتك أنك ممكن تكمل حياتك بشكل يرضيك ويرضى أمنياتك…
ولكن كل ده هيفضل فى النهاية متعلق بكل ما هو حقيقى بالنسبة لك …..فلو انت كنت واثق بحقيقتك الداخلية هيبقى سهل عليك إنك تستخدم آراءهم لمصلحتك بدل ما تخليها انها تتحكم فى حياتك …
حياتك بتبدأ من نظرة جديدة لنفسك فى يوم …..ممكن تخلى كل أيامك مريحة وممكن تخليها مؤلمة …
كل ما هتوصل لصورة واضحة لغايتك الخاصة ممكن تصنع فارق بين إنك تعيش حياة مليانة سعادة وفيها اختيارات حرة أو تعيش حياة فى دايرة ضيقة بتخلقها قرارات وأعذار وحجج قديمة ومملة بتحبسك وتخنق أحلامك…
كل واحد له مواهب ولما نقدر نوصل ونحدد المواهب دى ونقرر إزاى نستخدمها فى حياتنا هنقدر نبدأ حياتنا الحقيقية.
وده أمر مش متاح لكل إنسان واقف حيران فى اللى ممكن هيعمله فى حياته !
علشان كده الإجابة موجودة فى الآن يعنى اليوم.. وحياتك ممكن تبدأ من يوم !
رحلة كل واحد رحلة فريدة وكل واحد بيحاول يوصل المكان اللى بيتمناه ….المكان اللى بيكون فيه سعيد ويحس انه حى فعلا …وانه بقى يشبه نفسه ….
إمنح نفسك الإذن للحياة….إمنح نفسك انك تكون انت بصرف النظر عما يظنه اى شخص تانى عنك ….ما تحرمش نفسك الحياة اللى نفسك تعيشها لمجرد إنك قلقان من احتمال انك ما تكونش قدها أو إن حد يطلق عليك حكم سلبى أو إنك خايف من المخاطرة !
محدش هيستفيد من ترددك …بالعكس إنت اللى هتخسر إنك تلاقى شئ فى حياتك بيسعدك …إنك تلاقى سبب واحد يخليك تعيش أيامك وتبدأ يومك كأنك نور بيشع على العالم كله وحتى لو كان عالم صغير بتكتفى فيه باللى انت اخترت تنوره.
علشان تعيش اليوم لازم تملك القوة …والحب
وتكون عندك الرغبة انك تكون موجود كل يوم.
