حياتي اليوم صحيفة إلكترونية يومية
اوضه ضلمه..وواحد قاعد وحيد صوت بكاه عالي وعمال يعلى مش لاقى حد يسمعله.. فقرر يبقى لنفسه دكتور نفساني و دار الحوار بينه و بين نفسه …
_ عارف انا تعبان اووى .. تعبان ومش لاقى حد أشكيله … و عمال اتسبب في اذى ووجع لكل اللي بقرب منهم واللي بحبوني غصب عنى انا والله ما عايز أأذي حد ولا أوجع حد أنا مش عايز حد يكرهني .. مش حمل أحس بكده.
* لو كرهوك مكانوش اتوجعوا ليك.. لو اتوجعوا بسببك مكنوش سألوا عليك تانى.. مكنوش اهتموا بأمرك .. كمل كلامك …
_ كل اللي كان نفسى فيه أحب وأتحب بجد من غير وجع قلب فالآخر .. من غير ردود فعل تعمل عاهات مستديمة في الروح.. من غير بكا كل آخر ليل .. من غير جبال كلام مبقدرش أقوله.. من غير مواقف تكون طبقات تراب فوق شروخ روحي ..من غير ما اضطر اسكت واحط بلاستر ع قلبي .. واكمل سكات .. مش عارف أقولك ايه …
* كمل .. !
_ و نفسى كمان اتكلم .. ألاقى رد لـ ( مالك فيكي ايه).. لما حد يقول اتكلمى .. اعرف ألاقى الكلام جوايا وأرد.. ميهربش منى الكلام.. متهربش منى الحروف.. نفسى ابطل سكات .. بس يوم ما اتكلم اتفهم صح.. محدش يقولي معلش.. او وجعني قلبي من كلامك.. مش عايزه اوجع حد.. ولا اضايق حد بكلامي و لا تصرفاتي …..
* سكت ليه .. كمل!
_ نفسى في ابسط حقوقي.. اعيش بس ولو حره.. قلبي مش متشعلق بضيق ولا حزن.. اعيش ولو يوم بالطفلة اللي جوايا بدل شيب قلبي .. اتلصم بس فيه !!
* الحكاية مخلصتش.. ومش هتخلص طوول ما انت سايب باب قلبك مفتوح للحزن والضيقه.. خرجهم بره قلبك.. بره روحك.
————–
ندى محمد
مشروع كُتاب
