حياتي اليوم صحيفة إلكترونية يومية
بقلم خبيرة التجميل: نورا نصر
كلما ظهر منتج جديد او تقنية جديدة تنهال الأسئلة حولها وده شيء طبيعي.. ياتري عبارة عن ايه؟ حقيقة ولا مجرد دعاية؟ بيعمل ايه بالظبط في الشعر ؟انواعه ايه ؟ والاهم آمن ولا لأ ؟ وازاي اختار النوع المناسب لشعري.
وهنا أود التوضيح أن منتج البروتين هو المنتج المطور للكيراتين، يعني مش اختراع جديد تماما انما هو تطوير لنفس فكرة الكيراتين والبروتين الاساسي في أي منتج علاج للشعر هو بروتين الكيراتين، لانه زي ما احنا عارفين ان بروتين الكيراتين هو اللي بتتكون منه 88% من الشعرة الطبيعية، وهو اغني البروتينات بالاحماض الامينيه وهو المسئول عن نعومة وصحة وحيوية الشعر. يعني أي امرأة عندها مشكلة تقصف او هيشان او جفاف في شعرها يبقي لازم يكون بروتين الكيراتين يكون ضمن أي منتج هتستخدمه لعلاج شعره.
الفرق بين البروتين والكيراتين
مع التطور العلمي والتكنولوجي والابحاث اللي بتتم في مجال علاج والعنايه بالشعر، اكتشفوا ان عند اضافه بروتينات اخري قويه ومؤثره مع بروتين الكيراتين هتكون النتيجة افضل كتير.
وعلي فكره في انواع لسه باسم الكيراتين، واضافت فعلا التطور ده علي منتجها بس الشركات الاخري حبت تجدد الاسم علشان يكون له انتشار واهتمام اكبر بين العملاء لان الناس دايما بيبهرها الجديد افضل ما يتقالهم طورنا القديم لدرجة ان شركات كيراتين عملت منتجها هوه هوه مره تانيه في عبوه مختلفه وسمته بروتين عشان يتباع اكتر؟
فيه ناس بتسشأل: يعني المهم المنتج ده مفيد ؟
اكيد اه.. لانه بيدي الشعر البروتينات اللي محتاجها وكل شعر حسب مشكلته والنوع اللي يناسبه.
طيب نتيجته احسن من الكيراتين؟
فيه انواع نتيجتها افضل وفيه انواع نفس نتيجة الكيراتين القصه كلها في التركيبه ونوعية البروتينات الاخري المضافه للكيراتين
بيفرد بنسبة قد ايه؟
حسب نوعه وحسب طبيعة وحالة الشعر افضل الانواع بتفرد من 70 الي 100%.
بيفضل في الشعر اد ايه؟
نفس الكيراتين كل البروتينات المده المعتاده من 3 الي 6 شهور ومع التكرار والعنايه الصح ممكن يكمل ل 8 شهور.
بيتكرر كل اد ايه؟
كل ما تحسي ان شعرك محتاجله وكل مره الشعر بيتحسن بنسبه من ناحية الهيشان والجفاف والتقصف
طيب سعره اعلي من منتج الكيراتين ليه؟
لانه يحتوي بروتينات اخري قويه و عالية السعر بالاضافه للكيراتين + استخدام تقنيات حديثه ومتطوره لضمان افضل نتيجه وفاعليه للمنتج
