فجأة..وبدون أسباب، بتكون محتاج تبعد فترة عن كل الناس، محتاج تكون لوحدك، محتاج انك تلاقى نفسك، كله شايفك انك بقيت بنى آدم كئيب!
فجأة..وانت نفسك مش فاهم اللى بيدور جوه نفسك، الحزن بقى مسيطر على قلبك، والفكر بيتعبلك عقلك، وتنزل تمشى فى الشارع لوحدك، وتحس انك بقيت تايه..
فجأة..دموعك تنزل على خدك عشان صعبت عليك نفسك، كل اللى هنا وهناك بقى شايفك تايه، وانت عمال تسأل نفسك كل شويه، نفس السؤال: هو انا ايه اللى جرالى؟ ايه اللى غير أحوالى؟ طب ياترى لو رجعت بيتنا هلاقى نفسى مستنيانى، ولا انا هفضل كده تملي تايه؟
أنا ف حالة من التوهان، بقالى فترة كبيرة على دا الحال، بحاول ارسم الضحكة على وشى لمجرد كلام الناس، الأسئلة حواليا مبتنتهيش، وانا معنديش رد ولا سبب للى انا فيه، طب ارد اقول ايه؟
الاحسن اننا نفضل ساكتين، لو قلنا لحد على اللى وجعنا، مش هنستفيد غير معلش ومتزعليش، الكلام مبقاش يفيد، انا تايه في الحالتين، لو سكت او حتى لو حكيت!