حياتي اليوم صحيفة إلكترونية يومية
أهالينا زمان كانوا بيقولوا مثل جميل أوى "ضل راجل ولا ضل حيطة"، وكان دايما الفكر السائد فى المجتمع فى الفترة دى هى فكرة زواج الإناث لأنهم بيعتبروها نوع من الستر والإطمئنان بصرف النظر عن إى إعتبارات أخرى.. وبالرغم من إنهم علموهم إن الزواج مهم لإكمال الحياة البشرية بس نسوا يعلمهم إن الأهم من الزواج هو كيفية التعامل مع الحياة الزوجية بكل عيوبها ومميزاتها وإن الزواج منظمومة كأى منظمومة بها مشاركة بين جميع الأطراف المتعاقدة..
يعني مينفعش طرف طول الوقت ياخد بس من غير ما يفكر يضيف حاجة للمنظومة.. وكأن الحاجة الوحيدة اللى المفروض يديها هى الماديات فقط كأنها الأساس لنجاح اى علاقة.. وانه بالشكل دا اكمل دوره على افضل وجه.. نسينا نعلم ولادنا يعنى ايه زواج بالمعنى المتكامل.. يعنى ايه مشاركة.. نسينا نعلمهم يعنى ايه تفاهم.. نسينا كمان نعلمهم ان فكرة إن طرف ياخد والطرف التانى يدى طول الوقت فكرة خطأ كما وكيفا..
تعالوا نبدأ أول خطوة لتصحيح المفاهيم الغلط اللى بقت ماليه حياتنا.. تعالوا نبدأ نبطل التقليد الأعمى لأى مصطلح غريب.. نعلم بناتنا يعني أيه حقوق المرأة.. وإن الست لازم يكون ليها رأى.. فكرة مش غلط بس إحنا اللى بنفذها غلط..فتلاقي البنت ساعات بتفكر إن حقوقها فى التمرد وعلو الصوت والكلمة بالكلمة.. إن دا الصح.. نسينا خالص نعلمهم لغة التفاهم والإحترام والمشاركة بين الطرفين..
احنا فعلا نسينا نعلمهم مبدأ التنازل المقنن.. مش تنازل لمجرد التنازل وخلاص.. لكن فيه تنازل مفيد عشان تقدر المركب تمشى وتوصلنا لبر الأمان.. خلى عندك نوع من الحكمة والتدبير.. اعرفى امتى تقولى لا بالشكل اللى يليق بالزوج وبقدسية الحياة الزوجية اللى أمرنا بيها المولى عز وجل..وامتى تقولى حاضر عشان نقدر نوصل ونعلم ولادنا إزاى نحترم خصوصيات بعض.. والحفاظ على أدق تفاصيل حياتنا بعيد عن عيون اللى حوالينا حتى لو كان أهلك أو أهله..دى حاجة متقلش من شأنك إنت وزوجك ..ولا فيها أى نوع من عدم إرضاء الوالدين.. بس مبدأ الخصوصية إنعدم عندنا.. وخصوصا فى حضور "السوشيال ميديا" بقت الأغلبية تفاصل حياتها على العام..وبقت حياتك سبيل لأى حد معدى على الفيس أو غيره..إعرفى قاعدة مهمة حياتكم اللى إخترتوها حياة خاصة بيكم لوحدكم..ومش من حق اى حد يعرف تفاصيلها..
وفى قاعدة تانية رجالة كتير إلا ما رحم ربى متجاهلينها.. هى فكرة إحترام الزوجة.. وتفسيرنا الخاطى على انه نوع من الضعف..فكرة كلها إستفزاز وإهانة للراجل اكتر من الست.. لإنها مش أسيرة عندك.. هى أكتر واحدة هتتأذى لو المركب غرقت فى يوم من الأيام لا قدر الله..إحنا عايشين الحياة مرة واحدة ياريت نعيشها صح.. ونصحح لولادنا المفاهيم اللى محتاجينا فى حياتهم.. عشان يعرفوا يعيشوا حياه سوية من غير عقد نفسية!
