حياتي اليوم صحيفة إلكترونية يومية
كل سنه بتمر علينا بنحزن على مرور سنة من عمرنا، وبنفرح على بداية قدوم سنه جديدة، وبتكون بمثابة بداية أمل لينا على قدوم الفرح، وموعدنا مع السعادة المحتومة اللى كلنا بنحلم بيها، وللأسف الأغلبية منا بيمر بنفس تجارب السنة السابقة، وكأننا فى دائرة مغلقة بتختلف أرقام السنوات، ولكن تتشابة الأيام، ويتشابة الحزن، وتكون النتيجة المعروفة إن كل واحد فينا يعاتب سنينه على غياب الفرح، لكن محدش فينا حاول يدور على العامل المشترك مع كل سنة جديدة بتمر علينا، كلنا بصينا لنص الكوب الفاضى فى إن الأيام شبه بعضها لكن حد حاول يبص لنص الكوب المليان، ويشوف هو ليه حياته مبتتغيرش!
لفت إنتباهى التغير اللى عمله مارك فى الفيس بوك، وهو مشاهدة ذكرياتك، الاغلبية مننا بيشاهدها فقط، ومش بيحاول يتعلم منها ، لما تلاقى نفسك لسه واقف مكانك، والنتيجة هى هى، يبقى ساعتها العيب فيك مش فى الأيام، وبيبقى ساعتها معندناش غير حل واحد، وهو تغير المعطيات والأساليب عشان نوصل للنتيجة المرغوبة، حاولت تفكر مره تغير حياتك؟ تشوف ايه نقاط ضعفك وقوتك؟
عشان تقدر توصل لحل، تشوف ايه اللى لازم يتغير فى حياتنا، نحاول مره نكسر القيود اللى تعبتنا من كتر ما بتلف حوالين إدينا، بداية سنة جديدة بمثابة بداية حياه جديدة، تعالوا كلنا نبدأ من جديد، ونفكر بشكل مختلف، ونحاول نقفل ابواب الماضى بإيدينا عشان نضمن عدم فتحها مره أخرى، فكر واحلم وحب واكسر كل القيود والحواجز اللى قتلت أجمل سنينا ، وافتكر إن مرت سنة، بلاش نفضل واقفين بتفرج على باقى سنين عمرنا وهى بتمر قدام عنينا ، بس الأهم وانت بتبدأ عامك الجديد ابدأه صح واتعلم.
أولا : إن رضا الله والقرب منه نعمة مينفعش نبعد عنه مهما مشاغل الدنيا تعبتك دا القرآن نعمة.
ثانيا : بلاش نخسر اى صديق أو جار وقف جنبنا ساعة الضيق عشان خاطر حد قالك سيبه، الصديق الصالح رزق ومينفعش تسيب رزقك عشان حد تانى، وافتكر انك بعد ما تسيبة هيسيبك هو !
ثالثا : ابعد عن اى حد بيحاول يكسر طموحك ويكون متفنن فى وضع العراقيل والمصاعب قدام عنيك، حاول واتعلم وجرب وافتكر انك عشان تعرف الصح لازم تمر على الغلط.
رابعا : الحياه ابسط من إننا نضخم ونكبر اى مشكلة مهما كانت ياريت نتعلم نعيش ببساطة.
خامسا : ياريت نبعد عن الناس اللى بتقف على الواحدة وبيكونوا متفننين فى خلق المشاكل بلاش تعقيد الأمور.
سادسا : كلنا فى النهاية فى زوال، وافتكر إننا كلنا هنقف أمام العزيز الجبار، خليك دايما فاكر إن حسبك الله ونعم الوكيل، حاول متكونش انت الظالم ياعنى راجع حسباتك كويس الأول .
ياريت كلنا نبدأ من جديد ونتعلم إزاى نعيش حياتنا من غير تعقيد أمور الحياه بسيطة جدا وتستاهل تتعاش!
