حياتي اليوم صحيفة إلكترونية يومية
لازم نعرف في الأول يعني إيه مصطلح التوتر؟
– التوتر هو رد فعل طبيعي جسدي وعقلي لتجارب الحياة، انت معرض للتوتر من وقت للتاني بسبب المواقف والمسئوليات اللي بتتحط فيها؛ زي العمل والعائلة، حوادث الحياة الخطيرة، الحرب، موت شخص عزيز..
التوتر حاجة كويسة بالنسبة لك لكن لو زاد الشيء عن حده انقلب لضده.
والتوتر نوعين:
– توتر قصير الأجل؛ يختفي تأثيره بسرعة بمجرد الانتهاء من الموقف أو الضغط، ودا بيظهر في التعامل مع المواقف الخطيرة والأزمات، أو الشجارات وغيرها.
– وتوتر طويل الأجل، أو مزمن؛ ودا بيكون بسبب مشاكل مزمنة مش قادر تتخلص منها زي الأزمات المالية وغيرها، وللأسف دا ممكن يأثر على صحتك لو مقدرتش تتدارك الموقف وتحاول تحل المشكلة وتطلع من منطقة التوتر.
طب إيه طريقة تعامل جسمك مع التوتر؟
الجهاز العصبي المركزي وجهاز الغدد الصماء هما المسئولين عن استجابة جهازك العصبي المركزي..
لما تتعرض لموقف خطر، الجسم بيحفز الغدة الكظرية عشان تفرز هرمونات الأدرينالين والكورتيزول.
الهرومونات دي مهمتها إنها تخلي العقل متيقظ والعضلات متوترة؛ والنبض بيزيد.
ردود فعل الجسم في حالة التوتر قصير الأجل كويسة جدًا؛ لأن الجسم بيحاول يحمي نفسه فبيساعد على تخطي الموقف بطريقة إيجابية وسريعة.
إنما في حالة التوتر المزمن يبقى الجسم متيقظ حتى لو مفيش خطر. وبمرور الوقت الوضع هيكون متعب؛ وهيسبب مشاكل صحية.
طب لو التوتر زاد عن حده إيه الأعراض اللي ممكن يسببها للإنسان؟
ممكن التوتر يسبب مشاكل جسدية وعاطفية لو استمر لوقت طويل..
المشاكل الصحية ممكن تكون : إسهال أو إمساك، أرق شديد، واكتئاب، آلام في الرقبة، نقص في الطاقة وعدم التركيز، آلام في الرأس.
