حياتي اليوم صحيفة إلكترونية يومية
الكلمة دى لما بيتوصف بيها أى إنسان بيكون ليها تأثير وأضرار كثيرة على اى علاقة يقرر يدخل فيها، وللأسف إنتشرت فى حياتنا بشكل كبير لأن فكرة إن الإنسان يكون عديم الشخصية فكرة مؤذية للطرف التانى اكتر من الشخص نفسه.
والسبب الرئيسى في إنتشرها هو مجتمعنا المعاق فكريا فى إن الست فى المجتمع الشرقى لابد أن تكون معدومة الشخصية والأغلبية من الناس بيفسرها دينيا غلط وهى إن الرجال قوامون على النساء مع إننا لو فهمنا ديننا كويس هنعرف إن القوامة اللى ربنا قصدها فى كتابة العزيز هى الإكتفاء والإحتواء للطرف التانى مش واحد يفضل طول الوقت يدى أوامر وقرارات.
وللأسف الأغلبية حاليا بدأ يرجع لعصر أمينة وسى السيد، وبيعتبر إن دا السبب اللى هيؤدى لنجاح العلاقة والأغلبية من الشباب طول الوقت بقى بيدور على البنوتة الكيوت اللى طول الوقت بتقول حاضر. انا مش ضد انك تقولى حاضر بس انا ضد إنك تقوليها طول الوقت على الفاضية والمليانة، والستات اللى دايما بتشوف إن دا هيكون السبب الرئيسى لنجاح العلاقة منكرش إنها هتنجح بس لفترة مؤقتة لإننا حافظين مش فاهمين حافظين نقول حاضر وخلاص لمجرد إن الراجل يحس بشخصيته مع إننا لو ركزنا شوية هنفهم إن الراجل مخلوق طبيعى زينا مش خارق للعادة ولا حاجة إنسان هو كمان محتاج للإحتواء للحنان للطبطبة !
إحنا كمجتمع شرقى فهمنا ولادنا إن الراجل مينفعش يعيط، مينفعش يساعد، مينفعش غير انه يؤمر وبس، وللأسف دى الرجولة اللى وصلتنا لحياة تعيسة وكلها مشاكل حضرتك التكوين السيكولوجى لأى راجل .
هو إنسان محتاج للإحتواء محتاج لما يكون مخنوق يعيط يجرى على حد يحتويه ويفهمه ودا مش بيأثر على رجولته بالعكس.
مينفعش يكون طول الوقت هو رمز الأمان فقط، هو كمان محتاج للحماية محتاج انه يلاقى واحدة سند وجيش ليه، محتاج حد يطبطب عليه، حد يشاركه حياته، مش طول الوقت هو اللى عليه مسئوليات الدنيا والأخرة وانتى كل دورك فى الحياة هو المطبخ والأولاد، واقول حاضر وبس ودا سبب من ضمن الأسباب اللى خلت الاغلبية من الناس علاقتهم مجرد مظهر إجتماعى قدام الناس .
الناس اللى خلونا نضيع حاجات كتيرة حلوه عشان خاطر محدش يتكلم علينا ونسينا قصة جحا وحماره عيشوا حياتكم بالشكل اللى حبينوا من غير عادات وتقاليد خطأ طالما مش بنغضب ربنا ولا بنأذى حد، لو عايزه تحافظى على حياتك افهمى قاعدة مهمة جدا "إن الراجل مهما اعجب بالست اللى بتقول حاضر وخلاص من غير تفاهم ونقاش وإتمسك بيها فى أول العلاقة بيجى عليه وقت ويدور على الست اللى بتفهمه وتشاركه حياته" الست اللى فاهمة إنه إنسان قبل ما يكون راجل محتاج لحنان وإحتواء ونصيحة..
هو مش محتاج فى نهاية يومه غير انه يكون طفل وبس، حاولوا تتبادلوا الأدور طول ما هو برا البيت هو الحماية والسند والراجل، بس خلية جوا البيت هو الطفل المدلل اللى محتاج رعاية وحنان، محتاج يبعد شوية عن مشاكله اللى بيواجهها طول اليوم، هو فى نهاية يومه محتاج لأم، بلاش طول الوقت نعيش ونوزع أدوار مش شبهنا، خلينا نتبادل العطاء والحب، نتبادل الحماية، نتبادل السند!
