حياتي اليوم صحيفة إلكترونية يومية
النهاردة قررت اتكلم عن الصداقة اللى كلنا عرفين مدى قوتها فى تغير مزاج الشخص وحياته للأفضل، محدش فينا يقدر يعيش من غير صديق يتقاسم معاه كل أمور حياته من صدق وحب وبؤس، بس ليه محاولناش كلنا نخلى أفضل صديق واقرب صديق لينا هو نصك التانى، النص اللى عايش معاك كل تفاصيل حياتك وهو اقرب حد لقلبك ليه دايما مقسمين نفسنا أجزاء ؟
ليه مانحاولش يكون جوزك أو مراتك هى كل حياتك مش مجرد حد بقابله فى آخر يومى خليه دايما يكون هو صديقك اخوكى حبيبك وجوزك، ولو كلنا حاسين اننا بعدنا عن بعض تعالى نبدأ من جديد وكأننا لسه بنعرف بعض، افتحى صفحة جديدة وتعالى اقولك على بعض النصايح عشان نكون اقرب حد لأغلى الناس على قلوبنا ..
عشان تكونى صديقة جوزك الصداقة هنا أنوع :
أولا : الصديقة المنعشة: حاولى دايما تكونى هنا مصدر الحماس والنشاط والنافذه اللى بيشوف بيها كل حاجة جديدة من حواليه.
ثانيا :الصديقة المماثلة: واللى اقصد بيها هنا ان يكون عندك نفس إهتماماته، وقادرة على فهم وجهة نظره وأفكاره من غير ما يتكلم.
ثالثا :الصديقة الحكيمة:حاولى هنا تقرى وتتعلمى لو بأبسط الأمور انك تخصصى ربع ساعة من وقتك كل يوم للقراية، ولو معندكيش الإمكانيات ولا الوقت خلي وقتك اللى بتعدية على النت يكون على الصفحات المفيدة ثقافيا ودينيا، دا هيساعدك إن يكون عندك خبرات كتيرة، ودا هيساعد كتير فى تغير شخصيتك وإدراكك للأمور بكل وعى.
رابعا :الصديقة المرحة: بلاش والنبى بوز البطة اللى كلنا بنعمله طول الوقت، حاولي تدى لنفسك وليه وقت للراحة والمرح، ودا هيساعد كتير فى تخفيف حجم المشاكل بينكم وخلق وقت من البهجة.
خامسا :الصديقة الذاكرة: الستات معروفة بقى إننا مبننساش، اجاوزنا رايحين فين، ولا جايين منين، مركزين معاهم طول الوقت، بس خلى تركيزك معاه يفيد العلاقة مش العكس، ذكريه بمواعيده ولقاءاته الهامة والمناسبات العائلية، وغير ذلك من يوميات الحياة.
بس قبل كل دا فى نقطة مهمة لازم تكون موجودة بينا وهى "التقبل"، بمعنى انى اتقبل الطرف التانى بكل ما فيه بعيوبه قبل مميزاته، ومانحاولش نحول الطرف التانى لمسخ ونشكله زى ما احنا عايزين، ودى بتكون اكبر غلطة بيقع فيها الزوجين.. إن كل واحد بيكون عايز يحول الطرف التانى زى ما هو شايف سواء كان دا بيعجب الطرف التانى او لأ.. مابيحاولش كل طرف فينا انه يشوف التانى بعينه هو، يشوف زى ما هو حابب، مش زى ما احنا حابين..
خلينا نحاول نحسن بعض المفاهيم اللى اتعودنا عليها فى تربيتنا ومجتمعنا..خلينا دايما نشوف الحياه صح من غير تعقيد أمور، بلاش نقف لبعض على الواحدة ، ماتحاوليش دايما تستنى انه هو اللى يبدأ… حاولى انتى تقومى بأول خطوة.. وياريت نفتكر قاعدة مهمة إن الجواز مش معركة.. ومين هينتصر على مين.
الجواز حب وشراكة انتوا اللى في ايديكم تكبروها او تقضوا عليها.
