حياتي اليوم صحيفة إلكترونية يومية
أقر وأعترف .. أن حكومتنا من أذكي حكومات العالم .. مع انها مصدرة لنا «الوش العبيط» حيث تتعمد الحكومة ان تصدر لنا صورة لنفسها تظهرها عاجزة ومش عارفة بتعمل إيه ولا رايحة لفين ..لكن حقيقة الأمر أن حكومتنا طلعت بتقلد أفلامنا القديمة التي تكتشف فيها أن شخصية «الخط» والراجل الكبير زعيم العصابة هو نفسه الواد «مليم العبيط» أو عم «درويش المجذوب».
واللي مستحيل تشك فيه من أول الفيلم…لكن الأحداث المتلاحقة تكشفه..وانت كمشاهد تتصدم !!
وحكومتنا الرشيدة لبست لنا وش العبيط عندما أصرت إصرارا عجيبا علي قانون الخدمة المدنية وتعديل قوانين التأمينات والمعاشات! ليه ماتعرفش !!
ليتضح بعد ذلك أن من شروط صندوق النقد الدولي تقليص الجهاز الإداري للدولة إلي 1،5 مليون موظف بدلا من 6 ملايين !! علشان الحكومة «تعرف» تاخد قرضا !!
و الحكومة هات يارفع في أسعار الخدمات والمرافق كل كام شهر بصورة هيستيرية، بدأت بالبنزين والسولار ، واخدت في سكتها أسعارالكهرباء والغاز والمياه ، زيادة ورا زيادة، والناس هتتجنن من تصرفات الحكومة…أتاري تعليمات صندوق النقد هو رفع الدعم عن الطاقة، علشان الحكومة (تعرف تاخد قرض)!!
وكل كام يوم نصحي علي أزمة ارتفاع مفاجيء لسعر الدولار وانهيار لسعر الجنيه ، والأسعار تولع والناس تلف حوالين نفسها ..وتسأل ليه وإزاي وإمتي !! لتكتشف بالصدفة أن صندوق النقد عاوز الجنيه يعوم.. مع أن الحقيقة أنه بيغرق !! وده ليه علشان الحكومة (تعرف تاخد القرض)!!
والسؤال هنا..قرض إيه ده اللي يخلي الحكومة تعمل في الناس كده علشانه!
المفروض أن الحكومة بتجري ورا القرض علشان الناس وعلشان تخفيض عجز الموازنة..اللي هي بتحتوي علي أجور الموظفين وميزانيات الرعاية الصحية والتعليم وباقي التزامات الدولة سدادا للقروض التي تلتهم الجزء الأكبر من الموازنة !!
يعني الحكومة هاتقترض علي القروض علشان تعرف تسدد فوايد القروض !! إيه الذكاء والإبداع ده كله !! وهاتستغني عن الموظفين علشان تعرف تاخد القرض علشان توفر لهم الأجور بعد ماترفدهم !! وهنا تتجلي قمة الذكاء الاصطناعي !!
وعلشان توفر ميزانية للصحة تقوم ترفع سعر الدواء !!
وهكذا…أصبح كل شيء مباحا في سبيل قرض الصندوق !!
طيب.. مادام القرض هايخلص علينا قبل ماييجي .. فاحنا مش عاوزينه … قرض إيه ده اللي هايفقر الشعب ويذله من قبل ما ييجي..
وكان من الأولي بالحكومة أن تحسن التفاوض مع رموز نظام مبارك من المليارديرات ورجال الأعمال والمسئولين المتهمين بالتربح والكسب غير المشروع مقابل التصالح مع الحكومة…وكانت فلوس التصالح ستكفي وتزيد ما نريد الحصول عليه من صندوق النكد الدولي..وتفيض…لو كان في ضمير !!
وهنا أرجو من الحكومه رجاء حارا ..يا حكومة كفاية ديون..لقد خرجنا من عنق الزجاجة لندخل في «بوز الشاليموه» كفاية يا حكومة ديون علي حسابنا..ومش في حسابنا !
————
daliagamal2020@yahoo.com
