حياتي اليوم صحيفة إلكترونية يومية
شكيت للبحر همي طلع السمك يبكي!.
هكذا همست قبة البرلمان المصري لنفسها بحسرة..وهي تنظر من عليائها الي كراسي المجلس العريق وجدرانه التي شهدت عبر الزمن شخصيات وعظماء هزوا صفحات التاريخ وزلزلوا جدران البرلمان…
سألت قبة البرلمان المصري…مالك يا ستنا!! زعلانه ليه وبتبكي علي ايه؟
قالت ..كنت شاهده علي أول استجواب في تاريخ البرلمان المصري قدمه مرسي فؤاد باشا ،وعشت وشفت علي كرسي رئيس البرلمان ده عبدالله باشا راغب، وسعد زغلول باشا، ومصطفي النحاس باشا، وعدلي باشا يكن، ومحمد حسين باشا هيكل ،وأنور السادات وصوفي أبو طالب، ورفعت المحجوب.
وشفت أعضاء باشاوات وباكوات..وعشت وشفت تاريخ مصر بيترسم وقوانين بتتشرع ،وصولات وجولات لأساتذه وفقهاء في القانون حبوا البلد دي من قلبهم ، والنهارده عرفت ان البرلمان هيرجع تاني بس برضه بشكل تاني، وان حتي اسمه اتغير وبقوا يسموه « سيد قراره»!! وعرفت ان اللي عاوز يدخل البرلمان بقي له شروط غير شروط عضوية زمان، لازم يشتري أصوات الناخبين !!والصوت وصل لحد 700جنيه!! تفتكري ليه ؟
قلت ساخره أكيد علشان بيحبوا مصر وعاوزين مصلحتها فبيضحوا بالغالي والنفيس لأجل عيون المحروسة!
قالت القبة غاضبه: سلمولي علي مصر سلمولي !! ﻷ يا سيادة الصحفيه المجتهده..وخديها من قبة برلمان عجوزه زي حالاتي كلمه.. اللي بيدخل المجلس الموقر عارف انه مش داخل المجلس علشان شقه تمليك بالقسط المريح اوي، ولا علشان المكافأه وشوية البدلات لحضور جلسات اللجان، ولا حتي علشان السفريات البلوشي رايح جاي ، اللي بيدفع ملايين في شرا أصوات الناخبين وراه ناس تقيله ليها مصالح تخلص جوه سيد قراره، قرارات اقتصادية وتشريعات ضريبية وقانونية واجراءات تخصيص أراض ومناطق حرة جديدة..كل حاجة من الحاجات دي ليها ناس منتظرينها..وأي قرار بيبقي من خلال «سيد قراره» المجلس…ده طبعا غير الحصانة …اللي تمنع السلطة التنفيذية انها تهوب او تفكر تلمس شعره من اي عضو من غير اذن المجلس الموقر…وعلشان كده في المجلس الجديد فاز تجار أراضي وتجار مواشي وتجار سيارات..وبتاع كله ..وبياع كلام…وبتاع عطاره..كوكتيل وتوليفه عجيبه …وكل حي وله مصلحته…
بكت قبة المجلس الموقر وهي تقول: ياريتني ماعشت لحد ما اشوف اليوم اللي فيه برلمان مصر المحروسه بيتبهدل كده..!
بس انا هاشهد..واسجل..وهاكتب علي صفحات التاريخ مافعله المصريون بمصر…وهافضل اشتكي همي للبحر…وهيفضل السمك يبكي بدل الدموع.. دم.
———————
daliagamal2020@yahoo.com
