حياتي اليوم صحيفة إلكترونية يومية
أنت أحمد ولا َّ مينا = هيَّه تفرق عندى إيه؟!
كلنا راكبين سفينه
وحلمنا باصين عليه
لمَّا واحد يبكى فينا
كلنا نمسح عنيه
أنت أحمد ولا َّ مينا = هيَّه تفرق عندى إيه؟!
مش هيفرق عندى اسمك
ولا ّ دينك إيه يكون
مش هيفرق عندى رسمك
ولا ّ شكلك أى لون
كلنا من جنس أدم
أصلنا صلصال وطين
أنت مصرى زى زيَّك
نبقى ليه متفرقين؟!
أنت أحمد ولا َّ مينا = هيَّه تفرق عندى إيه؟!
كنت غربى أوجنوبى
أو صعيدى سيناوى نوبى
خير بلدنا دى علينا
نفس توبك هوا توبى
كنت فلاح ولا َّعامل
دا البياض زينة السمار
ولاَّ استاذ ف المعامل
دا السلام يطرح عمار
أنت أحمد ولا َّمينا – هيّه تفرق عندى ايه ؟!
اللى خالق رب واحد
هوّا رازق للجميع
قلبنا لما يبقى جاحد
نلقى كل الخير يضيع
الحياة فيها اختلاف
والبشر متنوعين
بالتسامح وائتلاف
نلقى نور الله معين
أنت أحمد ولا مينا–هيه تفرق عندى ايه؟!
كنت مسلم أو يهودى
أو بتتبع للمسيح
دى عقيدتك ترتضيها
والأفق بينا فسيح
اللى عكسك ليه تدينه؟!
وليه تسئ له ف المعامله؟!
كله حر يا ناس ف دينه
باختيار و اراده كامله
أنت أحمد ولا َّمينا – هيه تفرق عندى إيه؟ !
لمَّا يبقى بينا بغض
ولا َّ كره يا ناس و تار
لمَّا نكره احنا بعض
يبقى بالتأكيد دا عار
الله محبه
والحب للمؤمن شعار
أنت احمد ولاَّ مينا –.هيه تفرق عندى ايه؟!
اسالوا نقش الزمان
واللى ناسى فكروه
دا الوطن حضن الأمان
ليه يا ناس بتعكروه
أنت أحمد ولا َّ مينا = هيَّه تفرق عندى إيه؟!
