بحب الشرقية
اتباهي انا بيها
وبناسها الطيبين
لو لفيت الدنيا بحالها
ألاقي الطيبة دي فين
عظيمة بناسها وكرمها
ما يختلف عليه اتنين
حافظة ودادها وعاشقاها
وترابها اشيله في عنيه
باحب بلدي الشرقية
لو ندل ف يوم يعاديها
او فكر يجرح فيها
تلاقي الصغير فيها
يدافع بقوة عفية
أصيلة بلدي الشرقية
قالو فلاحة قلت ومالو
من غيري تموتوا م الجوع
أكلكوا لبسكوا كله بحالوا
من خير ارضنا المزروع
ناسيين خيرها عليكم
والا عايشين ف وسيه
من خير بلدي الشرقية
تاريخها واضح وباين
والكل يشهد ليه
يسلم زرعها الي زاين
بلدنا والخير تلاقيه
دي النسمة فيها شقية
جميلة بلدي الشرقية
من عرابي واجدادنا
لعند اصغر اولادنا
عظماء صاينين بلادنا
شاربين اصالتها بجهادنا
طبعا مهي بنت بهية
اكيد دي بلدي الشرقية