حياتي اليوم صحيفة إلكترونية يومية
كل اللي حيقرأ العنوان حيفكر إن أنا بتكلم مع فكهاني أو بمناسبه غلاء الأسعار، فحد يفكر أني بدي دروس لستات واعرفها إنها إزاي تكون إقتصاديه وطبعااا نتيجه لغلاء الأسعار الا حيعرف يشتري فاكهه أو حتي كيلو باميه دا لازم يدخل موسوعه جينس..
انا فعلاااااااا نصيحتي النهارده للبنات ونصحتي ليهم زي ما هي واضحه في العنوان وهي "إزاي تعرفي تشتري بطيختك صح "!
بس النهارده البطيخه اللي اقصدها هي نصي التاني.. النص الخشن اللي في حياتنا إحنا كستات..
اسمع ناس كتيره أووي تقولي الجواز عامل زي البطيخه وأنتي وحظك بقي يا قرعه يا حمرا ولأن الاغلبيه من الستات للأسف البطيخه بتاعتهم قرعه ومش عارفين هو العيب فينا.. ولا العيب في إختيارنا من الأول..عشان كدا أنا عايزه اقف عند النقطة دي شوية.
هو إحنا ليه سلبيين لدرجه إن أهم قرار في حياتنا ويعتبر قرار مصيري حتي مش عارفين نختاره صح وبكل بساطه نقول أنا وحظي بقي.. أحب اوضح لحضرتك نقطة ان كل شئ بيبان من الأول.. بس إحنا الا بنعمي عيننا.. بلاش بقي السلبية الا بقينا عايشين فيها.. ولو انتي إستسلمتي ومحاولتيش تشوفي دا فدي مشكلتك بلاش تخليها مشكله عامه ..وتفضلي تعقدي إلا حواليكي وتلغي تفكيرهم هما كمان وتخليهم يواجهوا نفس مصيرك.. القدر والنصيب دا شئ محدش يقدر يتدخل فيه بس ربنا ميزنا بالعقل ووضح لينا الطريق ياعني متجيش حضرتك بقي ترمي نفسك قدام قطر وتقولي دا نصيبي!
عشان كدا انا بتكلم مع البنوتات الا لسه في بدايه الطريق تعالي معايا بقي واحده واحده وانا اقولك ازاي تشتري بطيختك صح
1-أول شرط بقي يا ستي هو "الدين":
يا عني إختاري اللي يعرف ربنا في كل تصرفاته لانه عمره ما حيظلمك حتي لو مش بيحبك بس مش معني كدا انك تدوري علي الشيخ الشعراوي مثلا.. بس كفايه انك تاخدي واحد بيعمل حساب لربنا في كل تصرفاته.. لان الأساس الديني هو الأساس اللي بيحقق الصفاء والوئام والسعادة والإطمئنان.. وطبعا سيبك بقي من المغريات الأخري الرسول عليه افضل الصلاة والسلام قال: "تنكح المرأة لأربع "مالها –وحسبها- وجمالها –ودينها " فاظفر بذات الدين تربت يداك.
والشرط الديني هنا له هدفين
الأول هو إسعاد الرجل أو المرأه
الثاني تنشئة الأولاد نشأه صالحه
2- تاني شرط هو "تحديد الأولويات":
بمعني إنك تحددي أولوياتك في إختيار شريك حياتك ودا أمر نسبي ويختلف من شخص لأخر مع الإعتقاد التام والقاعده.. اللي كلنا لازم نعرفها كويس أوي.. وهي "إن مفيش حد كامل "
بس عشان تعرفي تحددي أولوياتك صح لازم تسألي نفسك هنا سؤال
هو أنا ليه حتجوز ؟
لما تلاقي الإجابة ساعتها حتعرفي تحددي أولوياتك صح.. ومننساش أهم حاجه إن مفيش حد بيعيش لوحده في أهل ليهم رغبات وليهم طباع وليهم عادات وتقاليد.. وكل دا حيكون ليه أثر في المستقبل علي شكل العلاقة وإستمرارها .. يعني مثلا في عائلات بتهتم بالامور المادية أو المظاهر الكدابه.. وفي عائلات أخري تهتم بالعلم والدرجات العلميه أو البساطة وغيرها من الإختلافات.. ودا ليه تاثير كبير علي شكل العلاقة ..فلازم نتفاهم الأمور دي قبل الزواج أو نتجنبها منعا لأي خلاف .
3- ثالث شرط هو "الجمال"
دي بقه صفه بيبحث عنها الطرفين بس لازم نعرف إن الجمال دا شئ نسبي بيختلف من شخص لأخر.. بلاقي ناس تضيع عمرها عشان تدور علي حد جميل.. وبسمع كلمه غريبه اوي ان واحده تقولي الا حتجوزه لازم يكون حد يبهرني بجماله.. الصراحة ببقي مستغربه جدا من صغر عقل وتفكير اللي قصادي.. والناس اللي بتفكر بالشكل دا بيبقي تركيزها في حاجه واحده وتنسي باقي الصفات ..وبعد كدا يحصل بقي ما لا يحمد عقباه.. والرسول عليه أفضل الصلاة والسلام حسم المسألة دي وقال إن اهم شئ القبول.
4- رابع شرط "الحسب والمال والأصل"
كل دي أمور ضروريه لابد من وجود النسبة والتناسب ..لأننا بنبني بيت.. فلازم نبني صح عشان الأساس يكون صح.. وفي الآخر منلاقيش كل شئ عكس ما إحنا عايزينه بس مقصدش هنا إن الأميره إنجي مينفعش تتجوز الضابط علي ونظام فيلم رد قلبي دا بس الا اقصده هو تناسب الأخلاق والطباع ولابد من وجود التناسب بين الطرفين ومش بس بينكم لكن بين أهلك وأهله عشان يتحقق الوئام بين الطرفين أما بالنسبة للناحيه الماليه في حديث عن الرسول عليه افضل الصلاة والسلام قال "يا معشر الشباب من استطاع منكم الباءة فليتزوج " ..والباءة هنا المقصود بيها القدرة الماليه والجسديه..مش معنى كدا ان شروطك يكون العريس عنده عربيه وفيلا في العين السخنه..بس اللي اقصده انك تاخدي الإنسان اللي يقدر يتحمل نفقات الزواج ومسئوليته من الآخر تحسي انه راجل.
5- خامس شرط هو "الحب"
هلاقي هنا بقى كل البنات مركزه أوي في النقطة دي.. مش حرام ولا عيب انه يكون في حب بين الطرفين.. واحلى كلمه اتقالت في الغزل هي كلمه حبيبي سيدنا محمد عليه افضل الصلاة والسلام عندما قال عن السيده خديجه إني رزقت حبها..الناس اللى بتحرم الحب بين الطرفين دي ناس مريضه نفسيا.. بس الاهم انك تلاحظي الفرق بين الحب المجرد من اي شهوات.. الحب الطاهر اللى اتوصف في القرآن وبين الحب الموجود في الزمن دا.. لانه ميعتبرش حب إطلاقا.. لان ببساطه اللى بيحب حد بيخاف حتى يلمسه قدام الناس مش عامل بيها عرض رايح جاي!
آخر حاجه عايزه اقولهالك عشان تعرفي تختاري زوج صح.. لازم تختاريه بوجود إطار من الدين والخلق ومعايير التكافؤ المعتبرة.. مع مراعاه الأوضاع الإجتماعيه للأسرتين مع حد التوافق النفسي والإجتماعي بينهم.
—————
يوميات رفيعه هانم والسبع أفندي
