30 نصيحة قبل ما تركب “الميكروبـــاص”!

1- متركبش ورا السواق عشان هتلم الأجرة.
2-السواق مش هيوطي الكاسيت.. أجّل مكالماتك لحد ما تنزل.
3- متوقفش قبل تحويدة عشان لو الميكروباص وقفلك الناس اللي وراه مش هتسيبه في حاله عشان قافل عليهم الطريق.
4- الأربعة اللي على الكنبة الواحدة لازم يقعدوا بالشكل ده • ° • °
5- جهز أجرتك من قبل ما تركب.
6- سيجارة السواق دي من المقدسات.. ما ينفعش تقوله يطفيها.
7- ابقى قوله على المكان اللي انت نازله قبلها بشارعين على الأقل.
8- وافق السواق في أي موضوع هو بيتكلم فيه عشان متدخلش في حوارات مالهاش لازمة.. السواق دايماً على حق.
9- الكرسي اللي جنب السواق ده مش ليك.. ما تفكرش تركب فيه عشان تبقى ضيف لطيف.
10- ذوق سواق الميكروباص في اختيار الأغاني والدباديب اللي في العربية دي حاجة مبنية على جرح قديم ومش قادر ينساه ومش موضوع للمناقشة.
11- عينك على جيبك طول الرحلة تجنباً للسرقات.
12- ربطات الحجاب العجيبة بتاعة البنات ممكن تضايقك وانت قاعد.. حاول تتجنبها بهدوء.
13- لازم يكون معاك كمامة صغيرة.. هتشكرني بعدين على الفكرة دي.
14- دايماً هتلاقي واحد بيفاصل في الأجرة مع السواق.. ده وحش سيبك منه.
15- المكتوب على ضهر الميكروباص دي حكمة مش حاجة بتضحك.
16- صور الطفل المعاق اللي هتلاقيها ده غالباً ابن السواق أو ابن أخته.
17- اللي نازل الأول بيركب برة.
18- انت متحرش في نظر أي بنت حتى لو لابس بدلة.. خليك عينك على جيبك زي ما قولنا عشان فيه بنات ما بتصدق يلاقوا حد بيبصلهم.
19- في الميكروباص انت مسير مش مخير.
20- كونك إنك تمد إيدك للميكروباص اللي جنبك عشان تجيب منه فكة للسواق ده واجبك وانت مش بتخاطر بحياتك ولا حاجة.
21- متفكرش تبتسم.. انت في ميكروباص ومفيش أي حاجة تدعو للابتسام.
22- متطلعش موبايلك جوه الميكروباص عشان بيبقى ملكية عامة وبيبقى على الأقل 4 مركزين في الـNews Feed بتاعة فيسبوكك مش انت لوحدك.
23- فيه بني آدمين كده الميكروباص بيدوس عليهم وهو ماشي.. ما لناش دعوة.
24- الكلاكس بتاع السواق ده مش لتنبيه السواقين اللي حواليه.. ده بيت مع الأغنية اللي هو مشغلها.
25- الميكروباص مش بتاع حارات.. بتاع غرز.
26- كوباية الشاي الفاضية جنب السواق دي تقريباً الميكروباص بينزل بيها.. زي برضه الراجل التخين أبو شنب اللي دايماً تلاقيه جنب الازاز وعلى رقبته فتافيت مناديل.
27- لو قاعد جنب الباب هتفتحو وتقفلو لباقي الركاب اللي داخلين وخارجين.
28- قواعد المرور بالنسبة للسواق دي مجرد إرشادات وتسقط منها صفة الإلزامية.
29- لو لقيت السواق مشغل أغاني أجنبي اعرف إنك مخطوف.
30- وأخيراً.. السواق مش بيقف.. الميكروباص بيفضل ماشي ولما سيادتك تيجي تنزل بيهدي بس.. وانت ولياقتك بقى.