حياتي اليوم صحيفة إلكترونية يومية
تكتبها : د.نهى أبو زيد
حضر إلى المعمل في أحد الأيام، رجل في الخمسين من عمره، وقال لي: “يا دكتوره انا عندي مشكلة كبيرة جدا مع زوجتي في العلاقة الحميمة، والموضوع ده جديد عليا، مع العلم أني كُنت كويس لغاية شهر فات، لكن حاليا انا مش مظبوط وحكيت لصديق لي، قالي يا سيدي احنا كبرنا خلاص وملكش حل غير انك تاخد الحباية الزرقا..وفعلا كنت رايح اشتريها لكن قلت فى نفسى أولا سأذهب لأستشيرك واسألك..فما رأيك ؟
وأضاف المريض الخمسيني: هو فيه تحليل يوضح المشكلة، ولا ده فعلا حكم السن والمفروض إني أبدأ في التعامل على إني كبرت فى السن؟
بداية قلت له وأقول لكل أصدقائى القراء: إن العلاقة الحميمة بين الرجل وزوجته لا تقتصر على السن، والرجل والمرأة بعد الخمسين لو لم يعانيا من أمراض وكان كل منهما محافظا على صحته فلن توجد أدنى مشكلة فى العلاقة.
قلت له: أنا هسألك بعض الأسئلة، ومن خلالها هنعرف هل فيه تحليل ممكن يعرفنا أيه المشكلة ولا المفروض تذهب لدكتور تناسلية وذكوره.
سن اليأس عند الرجال!
-انت كنت تخين ولقيت نفسك بتخس…؟
قال: فعلا انا خسيت حوالي 10 كيلو في الشهر ده بس انا قولت طبيعي بحكم عملى لأني بجهد نفسي في الشغل.
– بتشرب مياه كتير؟
قالي انا طول الوقت بشرب شاي وعصاير وقهوة وطبيعي بردو بدخل الحمام كتير بحكم المشروبات الكتير.
– طيب بتقوم من أحلي نومة عشان تدخل الحمام؟
قال: بيحصل طبعا وقلت اكيد البروستاتا بحكم السن طبعا.
– طيب فيه زغللة في عينيك؟
قال: نعم موجودة.
– فيه دوخة؟
قال: فعلا فى دوخه بشكل متكرر.
أسنانك حاسس انها بقت زي الماية؟
فعلا ..بس أنا قلت يا دكتورة إن عمري بقى 50 سنة يالله حسن الختام!
قلتله متعجبه جدا: حسن الختام أيه؟ هو حد عارف هيموت إمتى وهيعيش أد أيه؟ ..الأعمار بيد الله..ومش كل حاجة هنرميها علي السن وعمر ما كان السن مبرر لأي حاجة، وكل شكواك تتجه ناحية السكر بلا ادني شك يبقي لازم تحلل سكر!
سألته انت صايم؟
قال: لا لسه واكل من 3 ساعات
قلت: خلاص نحلل سكر عشوائي.
وبالفعل تم عمل التحليل وكما توقعت طلع التحليل 530
وعلى فكرة (تحليل السكر الصائم لا بد من صيام من 8 الي 10 ساعات، ويمكن فيها الشرب بشكل عادي، والسكر الفاطر بعد الأكل بساعتين بدون أكل أيضا ويمكن شرب المياه، والسكر العشوائى فى أى وقت).
وبالنسبة لتحليل مريضنا المحتار..النسبة عالية وبناء عليه قلتله لازم نحلل سكر صايم وفاطر وسكر تراكمي عشان تروح للطبيب المعالج بالتحاليل كاملة وتأخذ العلاج السليم.
قال: وأيه فايده السكر التراكمي؟
أجبته: السكر التراكمي بيطلع رقم، وهذا الرقم مؤشر مهم جدا للطبيب المعالج عشان بناء عليه بيقرر هل سيتم أخذ نوع ولا نوعين ولا 3 أنواع دواء أو الاتجاه للعلاج بالأنسولين.
تم عمل التحاليل بالفعل، وتم التحويل للطبيب المختص سواء كان طبيب باطني وسكر أو دكتور غدد صماء، وتم أخذ العلاج، وإعاده تحليل السكر بعد 10 أيام من العلاج، وقد تجسنت الأمور مع زوجته بنسبه كبيرة جدا.
وفي النهاية..أقول لأعزائي القراء: السكر لو صاحبته هتكسبه، وهيكون مرض بسيط وعادى ولكنه ملازم ليك، ولو عاديته هيدمرك كليا بمعنى الكلمة.
ومقولتي اللي دايما أقولها لأصدقائي الأعزاء: السكر يا أصدقائي ليس مرضا بل هو عرض لكل الأمراض من ضعف جنسي وأمراض القلب وشرايين لجلطات…الخ.
وللحديث بقيه طالما ظل صديقى المريض محتارا..!
