حياتي اليوم صحيفة إلكترونية يومية
لو نتكلم عن بلدنا فالبلد اتغيرت كتير عن زمان ..مبقناش نلاقى فيها الامان.. كل الى بقينا نعمله نقول هتافات وشعاارات.. ونطبل ونقول مصر مصر تحيا مصر.. ونتكلم عن الفراعنة والاجداد.. ده هما الى بنوا الاهرامات الى بقالها 7 آلاف سنة..
مبقاش ورانا غير الكلام ..مصر الان بيمثلها صافيناز.. بقوا بيطلقوا علينا بلد الراقصات لامؤاخذه !
هو كلنا نفسنا نهج ونمشى منها من فراغ.. ده الضعيف الى ملوش ضهر في البلد دى على طول متهان.. والاسعار عماله تولع..والمرتبات مبتكفيش المرتب بيتصرف وقت ميتقبض.. ويقعدوا يفكروا هيصرفوا طوال الشهر منين!
ده غير زحمة بلدنا وسوء المعاملة والتحرش في كل حته سواء من كبير أو صغير مبقاش عندنا أى مبادئ ولا احترام .. والغلط بقا عادى ويمكن صح كمان.. ما هو الحال اتبدل واتشقلب ياناس واللى معاه فلوس مستقوى دايما على الغلبان..
احنا في البلد دى بقينا تايهين مش عارفين الصح والغلط فين..دى بلدنا بقت تتباع واحنا قاعدين نتفرج ما شاء الله.. هى البلد خلاص كده وقف حالها ولا في امل لو واحد فى الميه انها تتصلح..؟ يا ترى شكل بلدنا هيكون ايه بكره؟ ياترى عنينا لسه هتشوف الاسوأ ولا الدنيا هتفكها معانا وتحلو؟
عجبى عليكى يا بلدى ربنا يصلح كل من فيكى ويهدى!
