حياتي اليوم صحيفة إلكترونية يومية
الحلقة الرابعة: مواجهة النرجسى.
( المحبة قد تأتى بعد العدواة والحب لا ينقلب كرهاً)
لو بتتعامل مع اى شخصية فى الحياة ممكن تقدر تنفذ القاعدة دى …لكن مع النرجسى الحب بيتقلب كره …والمحبة والصداقة بتقلب عداوة ؛؛؛ لمجرد أنك أرتكبت خطأ فى حق ذاته النرجسية !
اوعى تستغرب ان حياتك بتتقلب من( الحب) إلى (الحرب ) لانها كانت حياة غير حقيقية !! حطيت نفسك فى مكانة زائفة ، سخرت نفسك من أجل راحته ومصلحته وسهلتله طريقه فى (حب ذاته )
كان بيحبك علشان انت بتمثل له منفعة وبتساعده على قضاء أغراضه وتحقيق مقاصده ؛
كنت مفيد لمسار حياته ، بتغذى أعجابه بنفسه ؛؛
علشان كده النرجسى سهل عليه انه يتجاوز ويواصل حياته بعد الفراق لو وجد وسيلة اخرى لتغذية ذاته ؛؛؛ فأى شخص يقدر يحتل المكانة الزائفة ويمارس مهامه فى تغذية ذاته هيكون حبيبه !
فالنرجسى مش بيوجعه الفراق ولا بيحن ويشتاق بسهولة لما فقد ! إلا إذا فقد ما لديه !
الحب عنده ( جوع وتغذية وأحتياج وأشباع )
النرجسى هو بطل قصته وحبيبه هو مساعد لدوره بيعمل من وراء الستار …
فتلاقى نفسك دورك مخفى فى الحياة وساهمت فى تغذية شخصيته اللى أنت فى الأصل بتعانى منها ومش لاقى حل ولا علاج ليها!
أضطرابات الشخصية النرجسية مش شرط كلها تظهر فى نفس الشخص ؛؛ ممكن نلاقى صفة من الصفات دى :-
١- النرجسى …عنده أحساس بإمكانيات أستثنائية وانه فريد من نوعه مش هتقدر تنتقده لانه بيعتبر انك مستحيل توصل لتفكيره وعقله وانك سطحى ومستحيل تنصحه !
وده اللى بيخلى درجة أعترافه بوجود مشكلة فيه أمر فى غاية الصعوبة وبيصعب علاجه النفسى لانه عامل خط دفاع لاى أقتراح أو نقد أو نصيحة ؛؛؛ والقوانين عمرها ما هتطبق عليه ومحدش يشرط عليه شروط!
٢- النرجسى …بيعتبر نفسه انه يستحق معاملة خاصة وشديد الإلحاح على أحتياجاته ورغباته …عنده هوس نيل الألقاب والمناصب وبيبالغ فى علاقاته بالأشخاص ذوى المكانة والشهرة والسلطة .
بيتكلم كتير عن نفسه وبيوصلك ان خبراته معيار كل شئ!
٣- النرجسى …. مش بيستحمل التجاهل أو تجارب الفشل أو مساواته بالآخرين .
بيواجه النقد أو التعليقات السلبية اللى بتخص أفعاله بغضب شديد وبيواجهها بعنف وبيعتبرها أهانة ! بيقدر فى أوقات يكتم غضبه ويظهر شئ متناقض من بسمة مزيفة وفى أوقات تانية بينفجر بشدة ؛؛ ولكن غضبه بيتحول إلى بركان من الأهانات والتجريح لاى حد بينتقده لانه بيعتبره بينقص من بريقه ؛؛؛
علشان كده تلاقى اى حد بيتعامل معاه بيبقى حذر فى الكلام معاه ودايماً على أستعداد لترقب طريقة غضبه لانه ممكن من كلمة غير مقصودة يحول الموضوع لخناقة وممكن يطلع مواقف قديمة يزود بيها العاصفة .
٤ – النرجسى …بيقدم رغباته على اى شئ فى الحياة ؛ وذاته فى أولوية اى شئ وكل شئ قايم على وجوده وتلبية أحتياجاته ؛؛؛
وبيستخدم اللى بيحبهم فى تنفيذ رغباته ويخليهم يعملوا اللى هو عاوزه ويوصلهم انهم بيعملوا ده بإرادتهم وبيقدر يخليهم يشكروه انه خلاهم يقوموا بالدور ده ؛؛ ويوهمهم انه هو صاحب العطاء ومش المتلقى !
٥- النرجسى … ناقد وساخر لاذع وصائد للأخطاء …هزاره دايماً بيكون طريقة خفية بيستخدمها علشان ينتقد اللى حواليه من غير ما يعرض نفسه لأى لوم من اللى حواليه على كلامه وبيقدر يخرج من غضبهم وزعلهم من كلامه .
٦-النرجسى … حياته كلها قايمه على النجاح والانشغال الزائد بأحلام التفوق وبيقدر يهرب من أى شئ يخرجه من حلمه ويصنع لنفسه عالم يأهله للنجاح وده اللى بيخفف عنه الواقع وبيكون ملجأ له كل ما حقيقته تظهر قدامه من قبل الآخرين !
طموحه بدرجة غير عادية لتركبيته النفسية الغير متعاطفة اللى بتخليه يكون أستغلالى أو يستخدم الأخرين فى الوصول لغاياته وبيحاول يستخدم اللى حواليه لتحقيق أحلامه ونجاحه واللى غالباً بيكون الوصول إليهم علشان يحافظ على شكله ووجهته قدام الناس .
٧- النرجسى …بيبان انه رقيق ويملك حنية ولكنه لا يملك أحساس بالآخرين ..أحساسه بذاته فقط ؛؛ مشاعره زائفة ومؤقتة …
النرجسى ممثل بارع ؛ يبدع دوره بإتقان من غير جهد ؛ وبنوصل معاه لحد ما بنندمج مع صورته اللى بيصدرها ودوره اللى بيلعبه ؛؛ بنعيش فاكرين اننا نعرف الحقيقة الى ان يرفع الستار ويسقط القناع ؛؛ و تتقابل الوشوش وجهاً لوجه وبنصطدم بالحقيقة !
لو قررت تكمل حياتك معاه وتوصل لحلول سلمية لازم تدخل فى( مرحلة المواجهة ) وأولها انك تعترف انك سمحتله يتحكم فيك ويأذيك وتبدأ تصلح أخطاءك لانه عمره ما هيعترف بأخطاءه وتلاقى طريقة تتعامل معاه بيها وهى المواجهة …
(مرحلة المواجهة )
١- بلاش النقد
لانه عدوه الأول فهو لا يتقبل النقد بشكل جيد …فلو لاقيت نفسك بتقرب من الخلاف معاه فالطريقة اللى ممكن تحقق أنسجام هى أنك تستوعبه وتهديه ودى أسهل من الهجوم ؛؛؛ وممكن تفتكر ان الهجوم هيسهل فرض سيطرته عليك ولكن العكس هو الصحيح ؛؛؛
انت هتفقده قدرته على تعزيز وتعظيم نفسه لانك هتعكس الطريقة اللى هو متعود عليها منك ؛؛؛ وانه كل ما كنت بتهاجمه كان بيثير غضبك …فتزعله وترجع تصالحه وتحققله مطالب تانية علشان ترضيه وده اللى دايماً كان بيتوقعه منك !
معركة الهجوم انت دايما فيها الخسران ؛؛؛ لانه يملك سلاح لفظى وانت لا تمتلكه ؛؛؛ وبتفضل ترضيه وتزعل نفسك !
٢- بلاش اللوم
النرجسى لا يعترف باى خطأ وبيلوم الآخرين ولو عاوز تشرحله غلطه؛؛؛ وجه كلامك بشكل ما يكونش فيه أتهام له .
٣- بلاش تشكك فى أفعاله
النرجسى كاذب محترف وبيقدر يخليك تشك فى اى حقيقة بتواجه بيها ؛؛؛ علشان كده لو بتجادله فى شئ لازم يكون عندك أدلة علشان بيقدر يحول اى شئ لصالحه وأوعى تستجيب له فى كل مطالبه وأوعى تبقى زى الكورة اللى بيرميها ؛؛؛ يلعب بيها وتيجى وتروحله زى ما بيحب !
٤- لازم تعرف انت محتاج إيه منه!
لو محتاج يوفرلك الدعم العاطفى والتفاهم ؛؛؛
فالنرجسى لا يوفر الدعم لأفتقاره للعاطفة ، فممكن تعوضه من أختلاطك مع الآخرين ؛؛ ولو حياتك مليانة بالأهتمام من اللى حواليك ومش محتاج لدعم أضافى …فأعتبر علاقتك وأستمرارك معاه مش هيضرك لو كان فى محيط الصداقة …
أما لو كان علاقة ( زوج أو والد ) يبقى أنت محتاج أعادة تفكير فى سبل التعامل معاه ؛؛ لانه لو مهم بالنسبة لك يبقى لازم عليك أنك تقبل نرجسيته وده هيوصلك لشعور بالأحباط بشكل مستمر فحاول بقدر الإمكان أنك تتجنب المشاكل معاه…
ومن ناحية تانية لازم تبدأ فى بناء قيمتك الذاتية بعيد عنه وتنسى أنك ممكن تأخد دعم لقيمتك منه ؛ لانه دايماً هيكون غير قادر على توفيرها لك !
٥- قدمله التعاطف لانه بالرغم من الثقة الزايدة اللى عنده لكنه فى أعماق نفسه بيبقى عنده نقص حاد فى الثقة الحقيقية اللى محتاجة دايماً لحد يعززها بأستمرار وطبعاً من غير ما تقدمله كل شئ بيرغبه لانه ما عندوش فهم للحب غير المشروط ؛؛؛ كل اللى بيعمله فى أطار غرضه فقط !
٦- لا تثق فيه لانه دايماً بيدور على طريقة للتلاعب بيك بكل سهولة !
٧- خليك مستمع له لانه دايماً بيحب اللى بيركز معاه وبيسمعه كويس ؛ ولكن أعمل ده فى حدود ؛؛؛ فلو فى وقت أنت مش قادر تسمعه أو بيطلب منك أهتمام وانت مش قادر ( أرفض )
أتعلم أزاى ترفض …..أتعلم تقول( لا).
٨- طريقتك فى طلب رغباتك …لازم تكون بطريقة تحسسه ان طلبك هيعود بالفايدة عليه وانه هيستفيد منه معاك .
٩- دايماً وصله انه له اليد العليا فى كل شئ بالكلام والثناء بصفاته الحقيقية اللى أنت بتحبها فيه وأكد على ده ؛؛؛ علشان تقوى ثقته فى نفسه و علشان تكسبه .
وأخيراً ….
قد يتعرض النرجسى لهزة عنيفة بتقدم العمر أو مرض أو فقدان وظيفة تغير نظرته للحياة ؛؛؛ فى الحالة دى ممكن تلاقيه بيعيد أختيار وتقييم نفسه وكأنه منح درجة أستبصار لذاته وإدراك للخلل والأعتراف به ، ويقرر أنه يخرج للواقع بنظرة أكثر موضوعية لذاته وعلاقاته ! وهنا ممكن تحصل معجزة أو تدخل ربانى بعد اليأس من علاجه !
فالنرجسى لا يتغير إلا إذا ذاق خسارات حقيقية تهز عالمه؛ أو لو اللى بيحبهم بعدوا عنه وشعر انه هيفقدهم بالفعل ؛؛؛ فيبدأ يفوق !
وأحياناً…. بتكون هزات مؤقتة وعابرة وبيستغلها علشان يزود التعاطف حواليه ويستعيد كيانه الذاتى مرة تانية !
وفى النهاية
” أقصر طريق لحل المشاكل هو المواجهة ورغم انها بتكون قاسية بس بتكشف الوشوش وأرحم من أنك تهرب وتتألم وتعانى لوحدك !
أعرف ان أى خسارة فى الحياة هى خسارتك لنفسك !
والأهم من أنك تلاقى اللى يحبك ….أنك تلاقى اللى يحميك من الأذى !
