حياتي اليوم صحيفة إلكترونية يومية
كلنا اكيد عرفنا الحب ودقناه سواء كان حب لصديق أو حبيب أو حب الأهل، بس المشكلة إن فى ناس منا مبتعرفش تحب، أو بمعنى أصح مبتعرفش توصل حبها للى حواليلها، ولا بتعرف تفهم لغة حبه، ودا دايما بيحول علاقتنا لصدام، يا إما مابنعرفش نحب الناس اللى قصادنا، يا إما مش قادرين نفهم لغتهم فى الحب، عشان كدا لازم نوصل للحلقة المفقودة بينا عشان نعرف نتواصل مع الناس اللى بنحبهم، وأول شئ لازم نفهمه هى لغة الحب، ايوه الحب ليه لغة زى اى حاجة موجودة فى حياتنا، وملهوش لغة واحده بس دا ليه لغتين ..لغة أساسية ولغة ثانوية !
وعشان نقدر نوصل لـ”اللغة الأساسية والثانوية” فى الحب لازم نعرف طريقة التعبير عن الحب وهى بتتلخص في خمس طرق:
أولهم: “الحب عن طريق الكلام”
ودى لغة بيجدها الأغلبية وبتعتبرها لغتهم الأساسية عن تعبيرهم للحب، وبالرغم من إن فى ناس كتيرة شوهت اللغة دى لإستخدامهم الخاطئ، بس لازم نكون عندنا الخبرة فى فهم اللغة دى، ونميز بين الحب الحقيقى والحب القشرة الظاهرى فقط، منكرش إن الأغلبية من النساء قلبهم فى ودنهم وبتحب الطريقة دى جدا بس حاولى توصلى وتفرقى بين الحقيقة والكذب عشان متدخليش تجربة إنتى فى غنى عنها أو انك تفقدى الثقة فى شخص جدير بحبك وإحترامك.
الطريقة الثانية: “الأفعال والخدمات”
فى ناس دى طريقتهم الأساسية، هى الأفعال والخدمات اللى ممكن يقدموها للشخص اللى بيحبه حتى لو على حساب مصلحتهم، المهم انهم ينفذوا رغبة اللى بيحبوه، ودول نقدر نسميهم كدا المسئولين عن خدمة “إتصل يصل” أول ما تتصل بيه أو تكلمة تلاقيه من غير تردد قدامك!
الوسيلة الثالثة: “الوقت “
ودا نوع آخر من التعبير عن حبه، تلاقيه شخص مستعد يقضي معظم يومه معاك من غير تردد أو ملل ولو لحظة، حتى لو كانت قعدته مفيهاش اى حاجة مفيدة المهم عنده يكون معاك وخلاص!
الوسيلة الرابعة: “اللمس”
دى طريقة تعبيرهم عن حبهم، اللمس لأى حاجة تخصك، أو إستغلال اى فرصة للقرب منك، ولو حتى بالسلام، او لمس الأشياء اللى انت متعود تلمسها !
الوسيلة الخامسة: “الهدايا”
ودا نوع محبب للبعض..الرسول عليه الصلاه والسلام قال “تهادوا تحابوا “، ودا بيخلق نوع من التغيير والقرب فى العلاقة من وجهه نظرهم، بيعتبروها دى الطريقة الأساسية للتعبير عن حبهم، بمناسبة أو من غير مناسبة يجبولك هدية، المهم عنده يشوف الفرحة اللى مالية عنيك!
ودي كانت الخمس وسائل للتعبير عن الحب، كل واحد فينا يمتلك لغة اساسية ولغة فرعية، ياريت كلنا نحاول نفهم لغتنا ولغة اقرب الناس لقلوبنا، عشان نقدر نوصل لنقطة إلتقاء وتفاهم بينا ، ونبعد شوية عن الصدام اللى بقى مالى حياتنا..!
