حياتي اليوم صحيفة إلكترونية يومية
كتير من الناس اللي حولينا وحتي نفسنا جربنا الحب جربنا نحب حاجات كتيرة وجربنا النقيض إننا كرهنا حاجات أكتر ودا شئ فطري ربنا خلقنا بيه ومن أفضل الحاجات اللي ربنا خلقها جوانا هي "الحب".
جربناه بأشكاله المختلفة.. حبينا حاجات تستاهل تتحب وحبنا حاجات تانية مع مرور الوقت إكتشفنا إننا بنضيع أحلي سنين عمرنا فيها ولكن حد جرب في مره إنه يقف عند كلمة حب ويفهمها بمعنها المتكامل وانه إزاي ممكن يوصل لدرجة الحب بأعلي طاقة وحيوية جواه
بس المره دي هنقرر إننا نحب نفسنا شوية عشان هي تستاهل إنها تتحب
الأغلبية مننا عاش وقت كتير في حياتة وهو متخيل وموهوم إنه بيحب تفسه ولكن مع مرور الوقت بيكتشف العكس ومش كدا وبس بل بيتفنن إزي في الإنتقام من نفسه
تعالوا نبدأ من النهارده وكل واحد فينا يقرر من جواه إنه يتصالح مع نفسه تعالوا نخرج الطاقة السلبية إللي قتلت أحلي أحلامنا وضيعت أغلي ما فينا وفضل الأغلبية مننا ميت بس مع إيقاف التنفيذ..
تعالوا نبدأ أهم خطوات التصالح مع النفس ..وهي:
وأولها: إننا لازم نقتنع بقاعدة مهمه جدا في حياتنا وهي: "إنه لا يوجد شخص سئ مطلقا " كلنا عباره عن مزيج بين الشر والخير بين الحب والكره محدش فينا ملاك ولا شيطان ودي الطبيعة البشرية اللي خلقنا عليها الله عز وجل
تاني خطوة: " هي التسامح " كلنا لازم نعرف إن التسامح هو أول خطوه للخروج من عنق الزجاجة لازم نسامح عشان نعرف نحب ونتحب لازم ننسى عشان نعرف نبدأ من جديد
ثالث خطوة: هي إضافه بعض التغيرات لحياتنا حتي ولو بأبسط الأشياء وأبسط الإمكانيات التغير شئ ضروري عشان نخرج كلنا من دايرة الروتين إللي كلنا عايشين فيه
رابع خطوة: هي الإنتقاد..بلاش كلنا نقوم بدور الجلاد في إنتقاد نفسنا بلاش نشوف كل العيوب وننسى نبص في نص الكوباية المليان ونشوف شوية المميزات اللي جوانا تعالوا نكتشف ذاتنا
خامس خطوة: هي الصراحة..لازم كلنا نضع نفسنا في المكان الصحيح بلاش نتجهلها بحجه الظروف اللي قتلت أغلي ما فينا بلاش دايما نحمل الخطأ حجم أكبر من حجمه وعدم إعطاء الإنجاز قيمة أكبر من قيمتها
خلينا نحقق التوزان المقبول بين الجسد والروح..
وأخر حاجه بلاش كلنا نضيع مفتاح الإنسجام الداخلي اللي جوانا ونرفض تماما إننا نتعامل مع النفس بتلقائية وبلاش أسلوب التكلف والتصنع مع النفس .. واكبر دليل علي كدا لما بيعجبنا طقم جميل بس للأسف بيكون ضيق ومش مريح ومع ذلك بنقرر إننا نلبسه لمجرد إنا عاجب الناس ونسينا تماما إننا مش مرتاحين فيه..
ونقيس بقي علي نفس المثال حاجات كتيرة اوي عملنها عشان غيرنا ونسينا إننا نرتاح أو نشوف نفسنا عايزه ايه والنتجة اللي بنوصلها في الأخر إننا بنكون أعداء نفسنا من أجل إرضاء الآخرين!
