أنا العصفور اللى ما يقدر يصده ريح
ولا يغير طريق ليا
أنا المجروح فى ليلة نوح
ولا تسمع صراخ ليا
أنا مخلوق أغنى طول ما انا طاير
وحس الكون براح ليا
واخد أغنى على كيفى وبمزاجى
وأنا طاير وفى الهوا فارد شراعيا
وانت جاى تقول غنى..!
أغنى ازاى ..!؟ وقبضة ايديك ماسكه جناحيا
وازاى صوتى بالغنا يعلا
وصوت أنينى جوايا..من خنقه ايديك فيا
وليه عايزنى ابقا أسير وتمنعنى انى أطير
وتحبس صوت الغنا فيا..
وتجى تقول بكل غرور ..
أنا اللى علمتو الغنا ومطرش الا على اديا ..!
ده برضو كلام …
طب اسمع بقا منى خلاصة القول ديا…
دا انا اللى الصبح يرفض يبتدى الا اما
اعلن بدايته فى أغانيا
واما النسيم يسمع لتغريدى
يميل ويا الشجر ملاغيه
والميه من صوتى تعرف طريق سيرها
ولفين هى معديا
فعجبى عليك وعلى كبرك
فلا يمكن هيجى يوم وتأسرنى
ولا تكسر جناح ليا
دا أنا العصفور اللى ما يقدر يصده ريح
ولا يغير طريق ليا