حياتي اليوم صحيفة إلكترونية يومية
لما عقارب ساعتى تدق
قلبى يرق واقول هيرق
القاه يضخ بسم عناده
جوه مشاعرى
واكتب شعرى
يبقى مثنى وانا بستنى
القى الفعل بيطلع مفرد
وافضل افرد فظنون شارده
ويا اهاتى
جوة ملامح حلمى الفارد ضله
ويجرى يقوله
ليه اشواقى ضمة عذابى
فحضن قصيدتى
وإن قوافى حروف الباء
..باستغباء ..
إنه بكلمة هيروى ورودى
والقى الرد فـ طير ابابيل
عمال يكوى شرايين جوفى ..
بكل تحدى
يكسر كل ضلوع اللهفة
وحبال بعدك رابطة اهاتى
تهرب اهه فجأه تبعتر
كل خلايا الحلم الخايف
انك رغم سكوتك دايما
حاسة رجوعك
ويخيب ظنى
ليه ياحبيبى …
تنهش جوة الروح بتأنى
ليه بتروح من حلمى الساكن
قلب نهار . ليه بينهار
وانت بتضحك
صوت ضحكاتك انياب تدبح
كل الفاضل
من فتافيت الروح جوايا
ليه بترسملى فواصل بينا
فاصل يقسم حلم لقاؤنا
بنبض فراق
والقى الحاصل
ديما منى….. انى اشتاق
عمرك شفت السمكة بتحلم بالصياد
يرمى الطعمة
ويا سكات الموج النازل رخ حنين
ولسان تهته اسمك شهقة
مع تنهيدة داخلة شباك
الرمش المادد طول اليأس
تموت بأنين
بكرة تحس ..
بكرة تحس بطعم الكاس
المنقوع صبره دمعه
ممرر لون الخد
بكرة تدوق من نفس الكاس
المدهون من سم عنادك
بس المرة الجاية ياروحى
مافيش ترياق
علشان موّت يوم تنهيدى
وانا باشتاق
————
* من ديوان ضفاير عشق.
