حياتي اليوم صحيفة إلكترونية يومية
الحلقة الثانية (خدعة النرجسى ):
من أسطورة ( نرسيس ) فهمنا ان النرجسيين مفتونيين بأنفسهم ودايماً عندهم أحساس أنهم أفضل من غيرهم والحقيقة المعقدة والغريبة بالنسبة لاى حد أنهم مش بيحبوا نفسهم وبس ؛؛؛ هما بيعيشوا داخل نفسهم وبيحسوا برغباتهم لدرجة بتخليهم مش شايفين اى شئ تانى حواليهم !
طب ما اى حد بيشوف رغبات نفسه انها مهمة !
ايه اللى بيخلينا نعرف ان ده من علامات اضطرابات الشخصية النرجسية !
الفرق ان احتياجاتهم بتكون بالنسبة ليهم عظيمة جداً واى شئ فى الحياة بيكون صغير ؛؛؛ بل وبيحتقروه وده اللى بيخليهم ما يفكروش فى غيرهم ؛؛؛ إلا فى حالة واحدة بس !
( لو احتاجوا من غيرهم حاجة )
حاجة النرجسى بالنسبة له غاية فى الأهمية ودايماً بيثبت انه مميز وذات قيمة لاى حد رغم ان جمهوره الحقيقى هو نفسه وبس !
النرجسى …بارع فى استعراض كل حاجة بيعملها علشان يلفت نظره ليك ويوصلك انطباع سليم عنه ؛ ممكن يتكلم بالساعات عن أشياء يملكها أو حاجات عملها أو ناس اتعاملوا معاه وانبهروا باللى بيعمله ودايماً بيبالغ وهو بيتكلم من غير ما ياخذ باله ؛؛ حتى لو كان اللى بيحكى عنه انجاز حقيقى فعلاً ؛ مش بيكتفى انه انجاز بل بيزود بأنه بيبالغ فيه !
وده اللى بيخلى (النرجسى ) دايماً محتاج لوجودك فى حياته علشان يسخرك لأغراض نفسه ؛ بتنبهر بكلامه وأفعاله وسهل عليه انه يقنعك ويخليك تصدقه ويوهمك انه بيحبك !
زى ما قولنا هو مش بيحبك انت ؛؛ هو بيحب نفسه اللى بيشوفها فيك !
بيفضل يمص كل حاجة فيك من حب وتعاطف وتضحية وطاقة وروح لحد ما يخلص منك ويسيبك تسأل نفسك السؤال اللى كل الناس مش لاقيه إجابة عليه!!
إزاى يكون فى الحياة شخص أعلن عن تقديمه للحب ثم فجأة تحول الحب إلى إساءة وألم ووجع ؟!
وتحولت العلاقة من علاقة (رومانسية ) إلى علاقة ( ألم ) طرف فيها عايش طول حياته كان همه فى الحياة يقدم الحب علشان يلاقيه وكانت هى دى أبسط مطالبه لكن لقى نفسه فجأة بيتأذى وبيتألم من حبيبه !
بيخلص فى حبه … وبيتخان !
وبتتهان كرامته وبيتحرج فى مواقف كتير فى حياته ؛؛ بيفقد منه و منها الثقة فى حبيبه وفى الناس وفى نفسه ومش بيقدر يواجه الناس ولا الحياة !
وبينصب لنفسه طول عمره محكمة يحاسب نفسه على سوء أختياره وعلى أخطاء مش أخطاءه ويلوم نفسه أزاى ساب اللى اعتبره حبيبه وسلمه قلبه انه يأذيه بكل سهولة كده ؟!
وازاى من غير ما يحس انه ( مؤذى ) أو (نرجسى ) ومن هنا نبدأ نعرف أزاى أتأكد من اللى بأتعامل معاه أو بأحبه ده شخص( نرجسى )!
(النرجسى ) أول ميزة بتميزه هى موهبته وذكاءه و هو من أكتر البشر اللى عمرهم ما بيراعوا مشاعر الآخرين واوعى تفتكر انه علشان ذكى هيأخد باله من اللى حواليه! ابداً ( ده عمره ما هيحصل )!
النرجسى …دايما عايش جوه أحلامه وأحياناً أحلامه بيستفيد منها الآخرين ؛؛ بس فى الأصل الحلم كان علشان يثبت نفسه ؛؛؛ والآخرين هما اللى كبروا حلمه لانه كان بينافسهم ؛؛ زى اللى أخترعوا العلوم والفن والرياضة والمشروعات
فهم ساهموا أن حياتنا أصبحت أفضل لانهم كانوا بيحاولوا يثبتوا انهم أفضل منا !
طب احنا ليه بننخدع فى النرجسيين ؟
أول ما بتشوفهم بتعجب بيهم على طول وأحياناً بنحبهم من اول مرة ونبدأ نتفاعل مع اى حاجة بيعملوها ومعظمهم بيكونوا مشاهير أو محققين نجاح فى مجالاتهم فنبدأ ننبهر بيهم وندور على كل حاجة عنهم والغريبة اننا ممكن نحبها حتى لو أول مرة نصادفها فى حياتنا !
يعنى لو كان ممثل أو مغنى نبدأ نشوف ونسمع أعماله ؛ أو لو كان كاتب نقرأ كتبه ؛ أو شخص ناجح فى شغله نسأله عن شغله كتير ؛؛فتبدأ تحصل جوانا حالة كأننا بنبنى تمثال جوانا له بنصنعه بنفسنا من كل حاجة بيقولها أو بيعملها أو بنشوفها فيه ؛؛ بنكون معالم التمثال وطبعاً كل ده من غير ما نحط اى عيب فى الحسبان وهتفضل عايش مع( تمثال الانطباع الأول) غير مدرك اى عيب فيه !
النرجسى …دايماً عنده أنجازات مدعومة بتقديره العالى لنفسه وبيسعى للتظاهر بيها ومستعد للعمل طالما العمل بيحققله تعظيم لنفسه ؛ عنده تركيز عالى جدا بيوجهه لهدف معين بيسعى علشان يحققه وكتير منهم ( مدمن للعمل ) .
النرجسى ….شايف نفسه ( عظيم ) فى اى حاجة بيعملها واوقات بيوصل لحد يقول انه أمهر شخص فى العمل ده !
النرجسى . بيحب التنافس ولكن للفوز فقط ! وما عندوش مشكلة انه يعمل اى حاجة علشان يفوز فممكن يقوم بالتزييف أو يكدب أو يخدع غيره يعنى بيكون على استعداد انه يحارب علشان يوصل لغرضه ويسلك اى وسيلة تحقق غايته ويفوز .
كل حاجة بيعملها عارف الغرض منها ايه !لان أختياراته مش عشوائية بل هى نتيجة تخطيط مسبق منه لتعظيم نفسه !
النرجسى …دايماً بيدور على كل شئ ملفت بيلبس ملابس وساعات كلها ماركات علشان يلفت نظر اللى بيتكلم معاه لانه بارع فى الكلام والاقناع!
النرجسى … نفسيته يا أما بتكون فى أعلى حالتها أو فى أسفل حالتها !
أقل احباط ممكن يخليه حزين !
النرجسى …..آخر حاجة ممكن يحس بيها إدراك ان البشر اللى بيتعاملوا معاه ليهم احتياجات ومواهب ورغبات خاصة بيهم وهو طبعا ولاعمره اهتم بيها وده اللى بيخلى كل واحد حاسس بالألم والمعاناة وهو بيتعامل مع شخص نرجسى رغم انه بيحبه لكنه مع الوقت بيحس انه فاقد الدفء الانسانى معاه لان كل الحياة قايمه على تحقيق أحلام ورغبات حبيبه النرجسى ولما هو يبدأ يطلب احتياجاته يلاقيه غير مهتم بيه !
فتبدأ نفسيته تدمر وبيعتبر انه مش بيحبه ويبدأ يحمل نفسه الخطأ لانه عايش طول حياته علشان يرضيه …. بس مش قادر يدرك ان النرجسى عمره ما هيقدر يقدمه اى شئ من أحتياجاته أو اى شئ بيحبه وبالذات الأحتياجات العاطفية لانه عنده مقدرة على تزييف (التعاطف ) !
بيقدر يقدملك أشياء بس علشان يحصل على اغراضه ويقدملك حب ومدح وثناء علشان يبهرك بيه بس مش بيقدر يكمل فى ده !
ومن هنا بتيجى الصدمة لكل حد اتعامل مع نرجسى !
مشاعرك تجاه النرجسى يا أما هتكون مشاعر حب قوية جداً وده نتيجة انبهارك بيه ….
أو مشاعر كره شديدة أوى نتيجة صدمتك فيه من أنانيته !!!
النرجسى دايماً عارف اللى بيحتاجه منك …
ودايماً بيطلبه وبيأخده اوقات بيتحايل عليك؛؛؛ واوقات بيجبرك باسلوبه ؛؛؛ وفى الحالتين ما بتقدرش ترفض طلبه !
علشان كده ….أول خطوة لو بتتعامل مع نرجسى ؛؛؛
أنك تكون انت كمان عارف انت محتاج منه ايه ؟! ولازم تأهل نفسك للتعامل معاه زى تعامل (الصفقات ) لو هتستمر فى التعامل معاه …
يعنى كل واحد عارف هيأخد ايه ؟! وهيقدم إيه ؟!
وخليه يدفع قبل ما يأخد واعتبرها (قاعدة ) فى تعاملك معاه ….
علشان ما تفضلش طول عمرك تدفع الثمن …وتحاسب على المشاريب….وتاخد فى الآخر بواقى حب وأهتمام !
لو اكتشفت( الخدعة ) ومش عاوز حد يكسر قلبك أو يأذيك، أوعى تخليه يختار بينك وبين حبه الأول !!! يعنى( حبه لنفسه ).!
