حياتي اليوم صحيفة إلكترونية يومية
“كيف يفرض إنسان سلطته على إنسان آخر يا وينستون ؟
فكر وينستون ثم قال :
بأن يجعله يعانى !!!
فالسلطة هى إذلال وإنزال الألم بأى شخص وهى أيضاً تمزيق العقول البشرية إلى أشلاء ثم جمعها مرة تانية وصياغتها فى قوالب جديدة من أختيارنا .”
(حوار بين أوبراين و وينستون …أثناء تعذيبه فى الزنزانة)
من الحوار ده نقدر نفهم معنى الشخصية العدوانية او زى ما بتسمى ( التسلط الممزوج بالغلظة ).
فى حياتنا أشخاص كتير عندهم القدرة على أنهم يظهروا بشكل لطيف وودود وفى نفس الوقت عندهم قدرة أنهم يعكروا مزاج اللى حواليهم !
بأساليب مكر تخلى اى حد يوصل لمزاج سيء أو يوصله لشعور سيء ولا يقدر يلومه ويعيش فى معاناة مش فاهم جاتله منين ؟!
السبب بيكون فى تعاملك مع الشخصية العدوانية وبالذات ( السلبية ) نمط المشاعر السلبية بيكون عنده غير مباشر يعنى اللى بيقوله غير اللى بيعمله ؛؛؛
فهو ( متناقض ) يظهر فى شخصية الطيب المسالم …رغم انه يملك عدوان كبير داخله !
سريع الأنفعال وبينسحب بسرعة من الموقف وهو مبين أنه مش زعلان بيقدر يسيطر على عواطفه ؛ بينكر مشاعره السلبية بالرغم انه من جواه بيشتعل عصبية وأنفعال ؛؛؛ زى اللى دايماً يقول ( خلاص أنا مش متضايق ) بس أحساس الضيق بيفضل جواه وبيطلعه بطريقة غير مباشرة فى أقرب فرصة …
بيعرف يجرحك عن قصد وبكل وقاحة وبيسميه هزار ؛؛؛ وتقدر تقول عليه ( هزاره تقيل وسخيف فى بعض الأحيان ).
ولو قولت انك متضايق هيلومك !!
ويقولك إزاى تضايق من هزار؛؛؛ يعنى هيحولك لمخطئ فى كل الأحوال .!
لو طلبت منه حاجة يفضل يأجلها بدل ما يرفضها ويطول فى التأجيل لحد ما توصل للوقت اللى مفروض عليه يوافق …. تلاقى نفسك زهقت وانت اللى تلغى الطلب !
صاحب الشخصية العدوانية السلبية عنده جمل تهد نفسية أى حد بيتعامل معاه؛؛؛
زى ( حلو اللبس ده عليك ومناسب لجسمك الممتلئ؛؛؛ أو مناسب لسنك ؛؛؛)
( حلو اللى أنت وصلتله ماهو يا دوب على قد تعليمك وثقافتك ؛؛؛ بس لازم تطور من نفسك ؛؛؛
) وطبعا لازم يزود أنا رائى وشايف أنك ممكن تعمل كده ؛؛؛
وغيرها من الجمل اللى بتهد النفسية
وطبعاً هو قاصد يقولك كده …علشان عارف أنك بتضايق وهو كمان بيقول كده لانه محوشلك مواقف مضايقاه منك من زمان بس زى ما قولنا بيستنى الوقت اللى يضايقك فيه ويطلعها !!
يعنى …قلبه أسود ؛؛؛
العدوانى ….بيمزج المدح بالنقد علشان ما يظهرش انه سيء ؛؛؛ يبقى قال المدح وبعدين حدفك باللى ضايقك !
وطبعاً هو بيكون فى غاية الأستمتاع من جواه على حالك وعلى حريتك أنك مش عارف ترد عليه !
ويبدأ يكلمك بصوت هادى وبارد ولو حس أنك أتعصبت يزود بروده ويتهمك بالمبالغة فى رد فعلك ويفضل يهدى فيك وهى دى سعادته أنه ينجح أنه يشوفك وانت بتفقد أعصابك !!
الشخصية العدوانية …بتظهر بسبب النشأة منذ الطفولة فى عائلة لا تسمح للطفل بالتعبير عن غضبه أو إحباطه فيبدأ يكبت غضبه وبيتعلم أساليب ملتويه للتعبير عن مشاعره …
بتظهر صفات الشخصية العدوانية فى :
١- العدوانى ….بيتسلط على الآخرين ومش بيراعى حقوقهم ولا مشاعرهم .
٢- العدوانى …. عنده جرأة زايده عن اللزوم فى إبداء رأيه ووجهة نظره إلى حد يصل إلى إلزام الآخرين بها فى بعض المواقف .
٣- العدوانى ….مبالغ فى إظهار مشاعر الإستياء والغضب والكره وعدم مراعاة مشاعر غيره
٤- العدوانى ….. عنده جرأة فى أتخاذ القرارات وتنفيذها ومتهور أحياناً وممكن تكون قرارات حاسمة ومهمة ولا تقتصر نتائجها عليه بس بل تمتد إلى غيره زى( أولاده …زوجته….طلابه …أصدقائه…
.وغيرهم اللى بيتحمل مسؤوليتهم او بيتعامل معاهم وبيتحملوا نتيجة تهوره أحيانا يصيب وكتيراً يخطىء)
٥- العدوانى ….دايماً عنده تحدى للآخرين وعنيد لدرجة كبيرة ومعارض لأوامرهم .
٦- العدوانى …. دايماً بيستخدم النظر لغيره بالعين بحده وقوة …وقوة فى الصوت مع أرتفاع نبراته وتسلط فى عباراته …
وكل كلامه فى أسلوب ( أوامر ملزمة وصارمة )
لو أنت بتتعامل مع شخصية عدوانية …لازم تسمعه كويس علشان تمتص أنفعاله وغضبه وحافظ على هدوئك لانه دايماً لعبته أنه يكون بارد معاك فى الأول علشان يعصبك ويحملك الغلط وأوعى تأخد كلامه أنه بيمس شخصيتك مهما فضل يوجه إليك كلام يضايقك ؛ أو يتريق عليك .
دافع عن وجهة نظرك بقوة طالما معاك اللى يثبت كلامك ؛ لانه دايماً هيحاول يفرض وجهة نظره عليك وفى الحوار دايما هيخليك تروح لنقط تانية يخليك تتوه عن هدفك الأصلى ؛؛؛؛ فحاول ما تخرجش عن النقط الأصلية فى الموضوع .
بلاش تستخدم معاه العاطفة والحب وواجه بالمنطق إذا كنت تملك الدليل ..
وأوعى تفكر تغيره لو كانت بينك وبينه صلة قرابة خاصة ؛ ودايماً حاول أنك تصلح من سوء التفاهم اللى بيحصل بينكم وتتجنب الجدال معاه لأنك هتلاقى نفسك بتلجأ إلى أساليبه اللى بيستخدمها ضدك فهتتحول إلى شخص عدوانى زيه بالظبط !
العدوانى …بيحب السيطرة وبيعتقد أنه قادر على تخطى أى مصاعب فى الحياة ولا يعتبر الفشل خيار من خيارات حياته ودايماً عنده أعتقاد أنه يعرف كل شئ وأى شئ عن الجميع وبيحاول يقنعهم بفعل الأشياء اللى على هواه علشان يتحكم فيهم !
علاقاته فى الحياة قليلة وكتير بيهربوا من سيطرته وفرض آرائه عليهم .
ودايماً بيحب يعمل كل حاجة بنفسه حتى لو مش على علم بيها ولكن يملك من الذكاء والشطارة اللى يأهله انه يقوم بأى عمل وبيديله ثقة بنفسه
ممكن تبهر الآخرين ويصدقوا آرائه ويتحكم فيهم ببساطة ؛؛
العدوانى ….الحب عنده بدون مشاعر …حب لتحقيق غايته وأغراضه فقط !
الشخصية العدوانية ….علاجها فى علاج سلوكى ومعرفى ولكن المشكلة فى انه أصلاً مش بيعترف بوجود مشكلة فى سلوكه وده اللى بيخلى مسألة علاجه فى غاية الصعوبة !
الشخصية العدوانية هتلاقيها فى مجالات بتطلب الجرأة والقوة فى تحصيل المصالح الشخصية أو الجماعية .
“السيطرة على الآخرين دليل كراهية وغضب وعدائية!
فكيف تفكر بالسيطرة على من تحب؟
إذا كنت تحبه حقا ستفرح حين تراه حرا مستقلا”.
(أوشو)
