حياتي اليوم صحيفة إلكترونية يومية
“احتاج الوحدة والسكون لكى أفكر، أفكر فى أي شئ؛؛ أدمنت التفكير في نفسي لأني دائماً أشعر بالوحدة وأني منسي؛ وكلما فتحت صفحة جديدة مع الحياة وجدتها أسوأ من التى تسبقها !”
الحوار ده لما تسمعه أعرف أنك بتتعامل مع طبع العاطفى …
علماء علم الطباع صنفوا طبع العاطفي تحت مسمى (السوداويين) لأن طبعه بيتسم بحزن دائم لا يقاوم ؛ حساسيته مرهفه جداً ودايماً حاسس انه منسي وغير محبوب !
العاطفي ….خيالي وحالم ومتأمل ومفكر علشان كده بتلاقى أغلب العاطفيين بيكتبوا مذكراتهم الخاصة لحاجتهم إلى التأمل وفضولهم لمعرفة نفسهم وتعلقهم بالماضي وحبهم المثاليات وده سبب انغلاقهم ….!
العاطفي ….شخص حساس للغاية تجاه صنف من الأحداث وغير ميال تجاه أحداث أخرى قد تكون أكثر خطورة ، لو حصله أمر حتى لو تافه هتشوفه ضعيف زى الطفل وممكن عصبيته تزيد !
ولو تعرض لموقف شديد الأهمية بس مالوش علاقة بيه بيبان أنه عديم الإحساس واللى بيشوفه بيحكم عليه بإنه قاسي!
العاطفي كالعصبي …بيهتز بسرعة مع الأحداث الصغيرة لو كانت مرتبطة بإهتماماته ؛؛
بس الفرق ردة فعل العصبي بتكون إندفاعية؛ لكن…ردة فعل العاطفي بتكبح أي ردة فعل غير ناضجة أو غير مناسبة بس بيكون لها أثر مش كويس على نفسه لأنه بيحمل كل حاجة داخل أعماق نفسه بدل ما يحملها لغيره !
وبيحس بعدها انها جرح عميق !
وبيفضل عايش معتبر كل حاجة بيتلاقاها من الخارج إنها جروح، ويبدأ يغلق على نفسه ، ويمنع نفسه من أي شئ حتى لو كان تافه ويخفى أى عمل بيقوم بيه علشان ما يعرضش نفسه للانتقادات أو الملاحظة من اللى عايشين معاه !
العاطفي …بيركز على ذاته وخجله وعدم ثقته بنفسه ووحدته لا تهيئه للارتباط بالآخرين بسهولة ؛ بيختار أصدقائه بدقه …ولانه بيحب الوحدة وعنده قيم عالية….دايماً كل حاجة فى الدنيا بتصدمه وبتجرحه !
العاطفي …أكثر الطباع ترددا ؛؛ فدايماً بيحتاج لحد يشجعه على التصرف مش بيقدر يكون قائد وبيفضل دور التابع !
العاطفي ….طموح ولكنه بيبقى فى مرحلة التمنى؛ دايماً بيفضل انه يعيش فى مرحلة عدم المحاولة ! لانه دايماً لا يملك روح الإقدام وبيفتقر إلى الثقة بالنفس اللى بتخليه غير قادر على تحمل مسؤوليات كبرى ؛ إنتاجه فى اى عمل بطئ ولكن شريف وبيتميز بالجودة اللى بتخليه يحصل بعدها على تقدير …
بينجح فى العمل الثانوى لأنه بيحتاج إلى من يدفعه للعمل ، بيفضل العمل فى فريق عمل صغير لانه بيكره فريق العمل الكبير ؛؛
بيبرع فى مهن كتابية ومناصب بيكون فيها موظفاً فى مكتب ووظائف يكون فيها منفذاً لأوامر رئيسه…
الملل …هو عدو العاطفي لانه دايما عايش فى وحدة وعزلة …
العاطفي….عنده حس قوى تجاه الطبيعة وذوقه راقي ..
مخاطر طبع العاطفي …
ممكن يتعرض للفصام.. ( يعنى مش الميل للوحدة وبس ! بل ممكن يوصل بيه الحال إلى الابتعاد عن الاتصال بالواقع !)
ممكن يوصل للهوس..( وهو صراع مستمر بين رغباته والموانع الإجتماعية ).
العاطفي ….بيظهر فى نماذج زي :
(العاطفى شبه الجامد )
بيكون نظام حياته أكتر رتابة وهدوء وبيركز اهتمامه على نيل الاحترام والأشياء المعنوية مش المكافآت المادية …
(العاطفى شبه الشغوف)
بيقترب فيها العاطفي من الشغوف وبيكون أكتر ثقة فى نفسه وأقل حزناً وأكتر إخلاصاً …
(العاطفى شبه العصبي )
بيقترب فيها العاطفي من العصبي لما بتزيد عنده الفطرية …فبيتشابه مع العصبى إنه مزاجي ، شديد الحساسية …
(العاطفي البخيل )
بيزيد عنده الحذر ، بيكون دقيق ، قلق على مستقبله ، منغلق على نفسه ، متقشف….
طفل العاطفي …
كتوم ، هادئ، غاية فى التحفظ ، لا يحب التواصل مع رفاقه إلا لما يحس بالأمان ، حياته فى المدرسة بيعيشها بصعوبة لافتقاره الثقة بالنفس وحاجته دايماً للدعم والتشجيع والتفهم ، بيكون تلميذ جاد …محتاج للتقدير حتى يطمئن وعلشان كده بيكون قليل الحيوية ؛؛؛ بيميل للخجل ، بيرتبك بسهولة لما بيتسئل في الصف أو خلال الامتحانات ، طبيعته منغلقة .
خصائص العاطفي ….
عدم الثقة بالنفس -خجول – متردد- دقيق إلى درجة الوسواس – كئيب – يخاف من الفشل – يحتاج إلى الشعور بالثقة – قليل المخالطة – منغلق .
وأخيراً….
فى مقولة لتوفيق الحكيم بتقول …
( لقد إستيقظ فيه العقل منتعشاً فى الصباح، وبدا له أن العاطفة كادت تضله !) .
