حياتي اليوم صحيفة إلكترونية يومية
أول ما بدأت أقرا عن تفسير طبع الشغوف جه فى بالى صوت سميرة عبد العزيز فى برنامج الإذاعة المشهور …”قال الفيلسوف” …وجملتها الشهيرة المميزة “كان لى صديقاً فيلسوف …بأقول الحكماء شغوف سألته فى يوم عن رأيه فى كذا ….”.
ومن هنا نبدأ نفهم معنى ( شغوف )
الشغوف هو شخص بيتمتع بحس عميق تجاه الأمور الكبيرة وبيعرف يتغلب على احتياجاته فى أحوال كتيرة …طموح وبيركز على غاية معينة ومسيطر علشان كده بيكون مهيئ للقيادة فهو خدوم ومحب للمجتمع وبيقدر العائلة والوطن والدين …
بيعتبر ان الحياة معركة يجب عليه انه يخضوها ويربحها وده بيخلى طموحه يدفعه إلى انفعالية شديدة بتقوده لتحقيق رغباته فهو دايماً متعطش للمسؤولية وبيهتم بنجاحه …
بيسعى للسلطة والقيادة وقادر على إدارة المؤسسات ..
وبيتميز الشغوف بإحترامه للقيم الأخلاقية وشدة تعلقه بالمبادئ – نزيه – شريف – يطبق أفعاله على أقواله …
عنده قدرة على الاحتفاظ بذكرياته السيئة والجميلة وبتفضل الذكريات محفورة فى راسه ومتعلق بيها ومش بيعرف يتخلى عنها !!
علشان كده تلاقيه مخلص لأصدقائه وعواطفه مش بتتغير بتخلي طبعه عاطفى أحياناً …
همومه كتيرة لانه دايماً متورط بأعمال مختلفة.. ومن كتر إحساسه انه دايما قائد وناجح ..بيستخف بهمومه لأنه مش بيتخيل وجودها !
إنفعالاته بالنسبة للقربيين منه ولمن يحبهم بتبان أنها قاسية لأنه عائلى للغاية.. بيحمى زوجته وأولاده وأهله وبعض أصدقائه.. ولكنه بينتظر منهم الخضوع لإرادته؛
وده بيكون بسبب حياته المهنية اللى بيكرس فيها كل وقته وكفاءته وضميره وموهبته علشان يحقق استقرار فى العمل …بيأثر عليه فى تعاملاته وبيظهر عليه مخاطر طبعه اللى بتظهر على شكل: (قسوة – تقشف – تصلب فى الرأى بشكل مرضى) وغالباً بيفضل ملازمه !
