ماشين في طرق مختلفة بنقابل وشوش كتيرة وش بيديلك الضحكة …ووش بيمسح عن عنيك الدمعة …!بنسيب ناس غالية… وناس مش فارقة معانا …!وبنعرف ناس مش بنصدق انهم بشر وناس شبة الملايكة…!
ونفضل ماشين فيكي يا دنيا نستحمل الصعب
علشان نلاقي الأمان والراحة…
نتعب ….،نقف…، نرتاح…؛ و نرجع نمشي لوحدنا ساعات !
ومع اللي بنحبهم اوقات … ومن غيرهم أوقات تانية !
وطول ما فينا نفس وروح لازم نكمل الرحلة واحنا مش عارفين اخر الرحلة اية يا دنيا!
أوقات بتكون الدنيا بخيلة علينا، مش بتدينا زي ما بنتمني! ….بس لما بنبطل ندور علي رزقها ونسيبه هو اللى هيدور علينا ،بنلاقي أبواب بتتفتح لينا ما كناش بنشوفها علشان كنا واقفين قدام باب واحد !بس مفتاحه مع غيرنا !
الفترة اللي بتفتح فيها الباب لنفسك علشان تعرف ناس وتتعلم وتجرب حاجات جديدة عليك وتكسب وتخسر وتلاقي وتفقد وتحب وتكره وتصادف وتفارق هي دي الحياة….. عمرك ما هتعرف تمشي حياتك علي ميزان ثابت لازم يتقل شوية ويخف شوية…
بس الرزق.. فعلا انك تصادف اللي يخليك تتعلم من غير ما تنجرح ولا تدوس علي حاجة ثابتة جواك !
اللي يقدر قيمة انك فتحتله بابك ودخل من غير استئذان ويحافظ انك تفضل فاتح الباب وانت مش خايف ولا قلقان …!