الإثنين , 22 أبريل 2019
الرئيسية / بقلمي / داليا جمال تكتب: ‎الفينو..مخالف للدستور !

داليا جمال تكتب: ‎الفينو..مخالف للدستور !

= 406


تخيلوا يا جماعة إن رغيف الفينو الأفرنجي بتاع ساندوتشات المدارس ، دخل التاريخ.. وفات عالدستور.. وكان ممكن يقلب الدنيا لو اتعمل مدور !

تخيل يا محترم… أن رغيف الفينو ده لو اتغير شكله التقليدي اللي احنا عارفينه من شكل طولي إلي شكل مدور، يعتبر جريمة، تلبس اللي خبزه (مدور) قضية مخالفة الدستور، ويحكم عليه بالسجن!

فقد أكد المستشار عدلي حسين محافظ القليوبية الأسبق خلال مداخلة لإحدي القنوات أنه أثناء مروره بالمحافظة طالبه المواطنين أن يصبح شكل الفينو مدور واستجاب سيادة المحافظ وطلب من وكيل وزارة التموين تنفيذ هذا الطلب.. ولكن العجيب إن سيادة الوكيل رفض..!

ولكن المحافظ أخذ القرار بأن يكون أي الفينو مدور بالفعل.. ‎إلا أن سيادة المحافظ فوجئ بأن هناك شكوي مقدمة ضده تتهمه بمخالفة الدستور والقانون!!

‎شوفتوا يا جماعة جزاء اللي ينفذ طلبات المواطنين.. شوفتوا حجم وقدرة وجبروت الموظف المصري العتيق!!

حاول انت بس إنك تغير في حاجة إن شالله تكون حتة عجين هيلبسك قضية.. ويوديك ورا الشمس.. حتي لو كنت محافظاً ولا وزيراً.. بس كمان الغريب في القصة.. إني كتير بالاقي ناس مخالفة الدستور وبيعملوا فينو مدور حتي بالأمارة اسمه (كايزر) وبيتباع جهارا نهارا عادي.. ولا حد اتمسك ولا حد لبس قضية.. جايز علشان إسمه خواجاتي (كايزر) فموظفين التموين بيتوهوا عنه وبيفتكروه حلويات!

‎فيا مفتشي التموين.. ويا رجال المحليات.. ويا أصحاب المخابز.. إمنحوا أبناءنا فرصة للتمتع بالحياة.. وأخبزوا لهم الفينو مدورا.. خليهم يحطوا جواه قرص الطعمية وفوقه حتة خس.. ويتخيلوا انهم بياكلوا ساندوتش هامبورجر أبوخمسة وتمانين جنيها!

‎امنحوا ابناءنا فرصة انهم يعملوا فيها ولاد ذوات.. ومن ناحيتي أضمن لكم تماما إن الفينو المدور مش مخالف للدستور.. ﻹني والله العظيم قرأت الدستور المصري كاملا.. وما قبله من دساتير.. ولم أجد فيه أي ذكر للفينو.

———

daliagamal7070@gmail.com

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: