حياتي اليوم صحيفة إلكترونية يومية
—–
يا معلمانى اتوجع
ويا ابتسامة فجر
لضحكة الزغاليل
وقلب نبضه اتخلع
خليتى شوقه يروح
يتغنى ف المواويل
يا مشيلانى تقيل
هموم تهد الحيل
تقسم معاها الروح
بالأمس كان الجدع
رمشه فحضن هميس
ياما شاف معاه أحاسيس
رافضة معاه تعترف
ان الحياة تمثيل
وان الوشوش تماثيل
وان القلوب بتميل
وبتصحى على خضة
بالامس كانله نهار
واليوم بيتوضا
بين العذاب واللوم
غرقان فحضن هويس
الفكر يتفضا..
كل الانين يلقاه
مستنى قلب البحر
ينشق من جواه
تطلع سفينة نوح
عينى عليه الجدع
عايش حلاوة روح
الجٌودي كانله البر
والكل يتغمز
مركبش ليه مع نوح
دلوقتى بيغمس
لقمة بنار الشوق
ولقمة تتنفس
كل الاهات اشواك
ولقمة تتوجس
احلام تموت عارفاك
مشتاق مابتحرمش
ولأمتى تستنى
المستحيل يرجع
انشق توب الوفا
مكتوب تبات مغلوب
كل اماتنوى تتوب
والذنب فعروقك
ولا عدش غير صبرك
عاشقك ومعشوقك
والصبر صبره انكوى
م العاشقين جمرات
وانت يا عيني عليك
يادوب بتتمرجح
بين الشفق سكرات
عشمان فيوم يندم
ويا الغروب ويحن
والجرح فيك بيئن
قالوا الجدع عاقل
واللى يصيبه الهوى
اكيد فيوم بيجن
