—
بالنسبه للاستاذ توفيق عكاشه أحنا معندناش اعتراض ان حضرته يظهر تانى على الفضائيات بس المفروض يكون اتعلم من اخطائه اللى خلت الناس اول ما تشوفه على القناه تقلب علطول وانا واحده منهم لانه اسلوب غير لائق بالمره ده غير اننا مش ملزمين خالص اننا نسمع حكاياته الشخصيه فى برنامج المفروض إنه بيناقش قضايا مهمه فى الدولة.
وفى وسط البرنامج يقلنا اصل حياه امبارح قالتلى حياه دى اللى هيا حرمه المصون طيب واحنا مالنا السيده حياه قالتلك ولا عادتلك وحضرتك بقى طالع تحكيلنا عن اللى المدام قالتهولك ممكن تخليها تقدم البرنامج معاك لو حابب ما هو بفلوسك برده وعجبى!
نقطه تانيه الالفاظ غير اللائقه عندما تصدر من اعلامى مصرى على الفضائيات اظن ده شئ مش مقبول بالنسبه لوضع الاعلام المصرى بين سائر الدول وبيبقى فخور بنفسه اوى على اساس انه بيخاطب باسلوب يوصل بيه لكل فئات الشعب حتى البسيطه احب اقول لحضرة السيد الاعلامى المحترم ان الاسلوب البسيط اللى بتوصل بيه لعقول الناس البسيطه ارقى بكثير من اللى حضرتك بتطلع تخاطب بيه الناس على الشاشة.
والشتائم اللتى أرفض ذكرها بمقالى اللى هيا جزء من اسلوب حضرتك فى مخاطبه الجمهور اللى عباره عن انسان ليه كرامته ووضعه اللى لازم يحترم حتى لو كان فلاح بسيط ولسه راجع من الغيط عشان يتعشى ويسمع برنامج سيادتك ويستفيد يقوم يلاقيك بتشتمه وتقوله اسمع يا … وبص يا واد وبصى يا بت الاسلوب ده ممكن تتكلم بيه على المصطبه فى الشارع مش فى برنامج اعلامى محترم لكن هنقول إيه وعجبى!
ده غير الاسلوب غير المقبول فى الهجوم على اى معترض على كلام سيادتك ، طيب ما عظمتك ممكن ترسينا على بر وتتمسك بمبدأ معين وقضيه معينه عشان الناس اللى بتتفرج ماتحسش بالشتات يعنى قبل ما برنامج حضرتك يتوقف تقول كلام ولما حضرتك رجعت البرنامج تقول كلام تانى خالص المبدأ إتغير بس الشتيمه والاسلوب الجارح فى مخاطبه الجمهور متغيروش انا مش بلومك بفلوسك برده بس بالله عليك رسينا عشان بس لما تعمل جمهور يكون حقيقى ويبقالك معارضين ومؤيدين ولكل رأى احترامه لان حضرتك عارف طبعا ان الإعلامى الناجح الشريف هو من يدافع عن قضاياه بمبدأ واحد وهو الحق وعجبى!