—
يكتبها: محمد عبد الحكيم
لقيت راجل شعره أبيض.. كبير فى السن.. شكله باين عليه الوقار.. ركب معايا.. ولما اتكلمت معاه لقيته فعلا حد مهم فى المحفل المحلي والدولي.. وبصراحة كان متواضع جدا..
خدني الفضول.. وسألته: هو شايف ايه سر نجاحه؟
وكان الرد بسيط جدا: كان بار بأمه قوي وكان تحت رجليها.
وكمان وهو شاب دايما بيحاول يساعد أي حد يقدر يساعده.. ولو الحاجة دي مش فى إيده.. وكان يعرف حد ممكن يساعده يوصله بيه.. ويقوله إعملها له عشان خاطري.
وبيقول إنه كان حاطط فوق المكتب عنده الحديث الشريف إلى بيقول “والله فى عون العبد ما كان العبد فى عون أخيه”.
والنتيجه أنه ماكنش بيعرف الخير بيجيله منين وإزاي.. وربنا يساعده فى كل حاجة.. ويقف جانبه.
فعلا مساعدتك لحد مش هتنقص منك حاجة بالعكس هتزيدك لأنك مش أكرم ربنا.