حياتي اليوم صحيفة إلكترونية يومية
وبقينا اتنين ماشيين في طريق
عاملين الضل العكسي لبعض
بنحَضّر تبرير خلف الوعد
بنحفز في وشوشنا القسوة
ونفارق وعدنا علي سهوة
وبنمشي في بعض..
فتتوه من شبورة افكاري واتوه
زى البنوتة ال مش فاهمة
أول ماتبين حلويات
أقعد علي رجلك مبتسمة
تسقيني حنانك لو في سكات
معرفش إزاى تاهت عني
دايما تهرب بعنيك مني
أنا كنت تملي بحس العين اللي بتهرب
كنت بكهرب تصرخ تنطق وتقول اللي مخبياه
اشمعني معاك كنت بسهم
كل اللي هاممني انك تفهم
قديه حباك
أتاريك لمابتفهم
توشم علي جلدي قساك
وف عز عنادك عالمسرح
م الكواليس ببقي متابعاك
وف عز شروخ الروح تضحك
ولا فارقة معاك
جرب خرب ياما قلوب
ركز مين غالب/مغلوب
افرز حكاياتك/لحظاتك
هتلاقي طيور ونسي بتنزف أصدق لحظات
وهكون بنقائي وإخلاصي دايما غالباك
طب ليه جمعت الورد الفايض م الحفلة
وفرشتلي بيه طرقة واوضتين
جننتني بالرقة الزايدة المصطنعة
والضحك اللي مفيش بينه مسافة كل دقيقتين
بتبيع الحب مقابل ايه؟
ايه اللي يخلي محارب يبقي إله من نظرك؟
تَخليٍه بعد ما كان وصلك؟
ليه بتبقي ماسوشي في بدء المشهد
وبتزرع خنجر وقت ماينطق باسمك نبض
كل اللي بتحلم بيه في حياتك فض ..
وانت ابن فينوس اللي اتخلت
كام مرة احتجت لحضن أمان ويئست
كام مرة اديتك أغصاني
وبكل براءة بتنساني وتقولي سكرت
